Footer

Kastoy kadin kababa ti politika ditoy pagilian?

Kuna ti Commission on Elections ken kapolisan a nadalus, naurnos ken natalna ti eleksion itay Mayo 14 ngem agparparang a narugit, napulipolan iti iregularidad ken kinadamsak daytoy nga eleksion.

Kitaentayo dagitoy napasamak iti kaaldawan ti eleksion:

  • Sangapulo a tattao ti naireport a natay iti aldaw ti panagbubutos: 3 ti natay iti Masbate, 2 ti napaltogan iti Abra, 2 iti Lanao del Sur, ken saggaysa ti napapatay iti Basilan, Negros Occidental ken Compostela Valley.
  • Naisanud ti eleksion iti 10 nga ili iti Lanao del Sur nga addaan iti kadagupan a 86,544 a butos a kuna dagiti opisial ti Comelec a makaapektar kadagiti maudi a puesto dagiti kandidato a senador ken naideklara ti sumagmamano a probinsia ti Mindanao kas iti 2 a barangay iti Basilan, 2 a barangay iti Zamboanga del Norte, ken presinto iti Barangay Cayontor, Kauswagan, Lanao del Norte ken Langiden, Abra.
  • Rinibribu a botante ti saan a nakabutos gapu ta napunas ti naganda iti presinto a pagbutosanda, malaksid laeng iti panagraira dagiti illegal a nairehistro a botante, double entries, saan a nalawag a nagnagan, ken kaadda pay laeng dagiti nagan dagiti natayen a botante iti listaan.
  • Nasaknap a panaggatang iti butos, ballot snatching ken switching ken panagraira dagiti armado a tattao a nangbutbuteng kadagiti botante.

Kalpasan ti eleksion, ania met dagiti napasamak?

Bayat ti panagbilangan iti butos, dua a mangisursuro ti napugpogan iti maysa a pagadalan iti Taysan, Batangas kalpasan nga inagaw dagiti armado a tattao dagiti ballot boxes sada pinuoran a puon ti nakauraman ti pagadalan a nakaangayan iti panagbilang.

Napaltogan ti asawa ti mayoralty candidate ti Tineg iti pannakagandat ti biagna.

Maysa a konsehal a nangabak ti napapatay.

Manamnama ti ingangato ti bilang dagiti mapapatay gapu kadagiti protesta ken panagsuitik iti panagbilangan iti butos.

Naireport a 15 a polis ti natay ken 17 ti nasugatan kabayatan ti election period. Kaudian ti pannakapaltog ti maysa a polis iti Solsona, Ilocos Norte babaen dagiti di pay am-ammo a tattao.

Iti report ti PNP, agdagupen iti 128 ti natay iti 218 nga insidente a pakairamanan ti 60 a kandidato ken politiko ken 66 a supporters ken agdagup iti 149 dagiti nasugatan.

Iti listaan ti maysa a pagiwarnak, addan 147 a biktima ti kinadamsak iti eleksion.

Ania ti kayat a sawen dagitoy a pasamak?

-Awan panangipirpirit dagiti sumagmamano a politiko iti linteg.

-Awan panagraem dagiti kandidato iti kinapateg ti biag.

-Saan a kabaelan ti Comelec a lapdan dagiti panaglabsing iti paglinteganna.

-Nagpaaramat dagiti sumagmamano a polis kadagiti kandidato.

-Saanen nga instrumento ti politika para iti panagserbi kadagiti umili no di igam a pangtaginayon iti kinabileg, bukod nga interes ken turay dagiti politiko.

Saludsod: Apay a kastoy ti kinakiro, kinadamsak, nasaknap a panagsuitik iti eleksion? Kastoy kadin kababa ti politika iti maysa a nademokrasiaan a pagilian a kas iti Pilipinas?

Comments are closed.