Footer

147 armas nakumpiska ti polis ti rehion

DAGUPAN CITY – Nakakumpiska ti kapolisan iti rehion 1 iti 147 a nadumaduma ti klaseda nga armas ken inarestoda ti 168 a tattao kas paset ti naing-inget a panangiyimplementarda iti gun ban para iti nadalus, natalna ken naurnos nga eleksion.

Impresentar ni Regional Director Police Chief Supt. Leopoldo Bataoil dagiti nakumpiska nga armas ken ni Region I Election Supervisor Police Chief Supt. Jefferson Soriano ken kadagiti kameng ti media bayat ti maysa a press conference a naangay ditoy itay nabiit.

Kinuna ni Bataoil a 103 a paltog ti nakumpiska manipud kadagiti naglabsing iti gun ban idinto a 44 nga armas ti nakumpiska kadagiti panagsukisok nga insayangkat dagiti polis iti rehion kadagiti masuspetsa a paglemlemmengan dagiti criminal elements manipud idi nayimplementar ti Comelec  gun ban.   

Inreport pay ni Bataoil a 119 a kaso ti naipilan iti korte maikontra kadagiti naglabsing iti gun ban.

Kinuna ni Bataoil nga agtultuloy dagiti regional police a mangipakat kadagiti checkpoints ken iti pannakaiwayat dagiti panagraut kadagiti masuspetsa a criminal dens tapno malapdan ti pannakabuangay dagiti pribado nga armado a grupo.

Impatulod ni PNP Chief Director General Oscar Calderon ni Soriano ditoy tapno asistaranna da Bataoil para iti naannayas a pannakaisayangkat ti eleksion itay Mayo 14.