Footer

6 natay, 20 nasugatan iti aksidente

TAGUDIN, Ilocos Sur – Innem ti insigida a natay ken 17 ti nakaro ti kasasaadna gapu iti aksidente itay nabiit iti nagbaetan ti maysa a bus, trak ken dyip iti barangay Libtong iti daytoy nga ili.

Nainaganan ti tallo kadagiti natay a pasahero ti owner type jeep da Ronald Lorica, 17, ken Jolo Labador, agpada a baro ken agnaed iti Baringcucurong, Suyo, Ilocos Sur; ken Begie Gonzalez, 20, residente iti barangay Bio, Tagudin.

Iti pannakaisurat daytoy, di pay naammuan ti nagan dagiti sabali pay a natay.

Nasugatan met iti aksidente da Aida Cruz, residente ti Santo Domingo; Raniel Quevedo, ti Dasmarinas, Cavite; Asher Gao-ay, 18; Dylan Bucalan, 22; Erick Palaganas, 17; ken Mac Donald Domino, 17; agpapada a residente iti barangay Baringcucurong, Suyo, Ilocos Sur; Alfredo Silapan, residente ti Mantanas, Santa Cruz; Florante Antonio, 36; Maria Ana Alicia Tayao, 23, residente ti Narvacan; Afroilan Prayedes, 48; Gretchen Agdamag, 26, Vigan City; Christine Gallebo, 25, Allangigan, Candon City; Liezel Quinones, 23,  Caoayan; Adona Marie Halunajar, 20, Caoayan; Jeffrey Ofiasa, 21, Dante Abungan, 24, Rosario, La Union ken John Paul Gutierrez, 22, barangay Bio, Tagudin.

Naammuan a minaneho ni Nicomedes Edgar Pascual, 36, residente iti Tondo Manila ti Dominion Bus Line, addaan plaka a AVS-245; ni Asher Gao-ay ti nagmaneho iti owner type jeep, addaan plaka a PRC-409, ken ni Jose Velasco, 32, ken residente iti Binmeckeg, Sison, Pangasinan ti drayber ti Isuzu forward wing container van,  addaan iti plaka nga AWA-131.

Iti inisial nga inbestigasion ti polis ditoy, mapapati a ti driver ti owner type jeep ti nangilugan ti pasahero iti igid ti kalsada sa bigla a nagsikko ngem dita metten a sumungad ti Dominion Bus Line ket nadungparna ti jeep a nakaigapuan ti pannakatultulid daytoy.  

Gapu iti pigsa ti impact, naidungpar ti Dominion iti puon ti akasia ken ti nakaparking a forward truck.

Insigida a naitaray iti Southern Ilocos Sur District Hospital dagiti biktima para iti panakaagasda ngem pimmusay dagiti dadduma gapu iti nakaro a sugatda.

Comments are closed.