Footer

Ari-ari latta dagiti Singson iti politika iti I. Sur

VIGAN CITY – Iti baet ti panagpeggad ni Gov. Luis “Chavit” Singson a saan a makastrek iti magic circle iti kinasenador iti nailian a panagpipili, dagiti latta Singson ti ari-ari ti politika ditoy probinsia kas ipasimudaag ti resulta ti eleksion ditoy itay Mayo 14.

No saan nga agbaliw ti trend ti panagpipili para iti kinasenador, umad-adayo ti gundaway a lumsot ni Chavit iti magic circle. Iti pannakaisurat daytoy, Mayo 18, adda pay laeng ni Singson iti maika-23 a puesto. Uray dagiti surbey ti Pulse Asia ken Social Weather Station, adda iti maika-23 agingga iti maika-25 a ranggo ni Singson, maibilang a kingmaker iti politika iti Ilocos Sur.

Iti umuna a distrito, ginabsuonan ni Ronald Singson, anak ti gobernador ni Bertrand Baterina a  kinasangona.

Iti opisial a resulta manipud iti Comelec provincial office, nakagun-od ni Singson, kandidato iti babaen ti Lakas-CMD, iti 73,496 a butos idinto a 29,187 a butos ken ni Baterina, kandidato iti babaen ti Liberal Party.

Sakbay ti panagkandidatona a para congressman iti umuna a distrito, dua daras a nagtakem ni Singson kas senior board member iti Sangguniang Panlalawigan.

Sublaten ni Singson ti kinadiputado manipud ken ni Dip. Salacnib Baterina nga agturposen ti maikatlo a terminona.

Kabayatanna, iti segundo distrito, kas ninamnama aglaplapusanan a nailayon ni Dip. Eric Singson kalpasan nga imbalatna da Ernesto Antolin ken Henry Capela, agpada nga Independiente.

Agdagup iti 133,183 ti butos ni Singson maikumpara iti 1,604 a butos ni Antolin ken 3,240 a butos ni Capela.

Naglayus met iti butos ni Bokal Jeremias “Jerry” Singson (Lakas-CMD), para kinabise gobernador ket intarayanna ni Estelita Cordero, kandidato ti United Opposition.

Nakabutos ni Bokal Singson iti 75,229 idinto a 20,942 ti nabutos ni Cordero.

Iti Vigan City, iti panagsubli ni dati a Mayor Eva Marie S. Medina, anak daydi naggobernador Titong Singson, a para mayor iti siudad, awan ti timmakder a kasangona.

Nailayon met ti anak ni Dip. Singson, ni Mayor Allen Singson, iti puestona iti Siudad ti Candon.

Kasta met a nailayon ni Alfonso Singson, kabsat ti diputado, kas konsehal ti Candon City.

Iti panagbanduria dagiti ag-Singson iti probinsia, isuda pay laeng ti ari-ari ti politika agingga iti awan ti makita a napigsa a nagan a mangibalat kadakuada.