Footer

DV naiproklamar a gobernador iti Ilocos Sur

VIGAN CITY – Iti baet ti alegasion ti panagsuitik iti eleksion, naiproklama ti baro a gobernador iti probinsia iti sardam ti Mayo 16 iti session hall ti provincial capitol ditoy.

Improklama ni Atty. Joel Gines, provincial Comelec supervisor, ni Vice Gov. Deogracias Victor “DV” Savellano a gobernador ti Ilocos Sur  kalpasan ti tabulasion ti resulta ti panagbubutos iti 32 nga ili ken 2 a siudad iti probinsia.

Kagiddan a naiproklama ditoy da Bokal Ronald Singson ken Dip. Eric Singson a nangabak a mangibagi iti dua a distrito ti Ilocos Sur; Bokal Jeremias “Jerry” Singson a nangabak a bise gobernador ken dagiti nangabak a bokal a pakairamanan da Ismael Baterina, Azucena Purisima, Ronnie Rapanut, Orlino Tesoro, ken Gerardo Lahoz (umuna a distrito); Zuriel Zaragoza, Robert Tudayan, Rosario Gironella, Jose Bunoan ken Peter Manzano (maikadua a distrito).

Pinadas ni Atty. Jessie Emmanuel Vizcarra nga atipaen ti proklamasion gapu iti mapapati nga iregularidad iti pannakabilang dagiti butos iti sumagmamano nga ili ken siudad ngem kinuna ni Gines a maiproklama dagiti nangabak kas maibatay iti tabulasion dagiti certificates of canvass manipud dagiti amin nga ili ken siudad iti probinsia.

Iti opisial a resulta ti panagbubutos, nakagun-od ni Savellano iti 132,656 a butos idinto a 131,264 ken ni dati a Bokal Efren “Rambo” Rafanan wenno iti diperensia a 1,392 a butos.

Kandidato ni Savellano ti partido Lakas-CMD idinto a nagtaray ni Rafanan iti babaen ti Partido ng Masang Pilipino (PMP).

Kangrunaan a nakuestionaran ti resulta ti panagbubutos iti Cabugao no sadino nga inluges ni Savellano ni Rafanan, ken ti siudad ti Candon.

Iti Cabugao a baluarte ni Savellano, nakagun-od iti 10,563 a butos maikontra iti 4,581 a butos ni Rafanan wenno 5,982 a diperensia.

Ngem adda dagiti alegasion iti panagsuitik iti Cabugao kas iti mapapati a ballot switching, nakalukat a ballot boxes, intimidation ken dadduma pay nga iregularidad iti eleksion.

Risiris ti puesto ti kinagobernador idinto nga inwaragawag dagiti agsumbangir a partido nga isuda ti nangabak iti eleksion.

Nangabak ni Savellano iti San Vicente, San Ildefonso, Cabugao, Bantay, Vigan City, Lidlidda, Sigay, G. del Pilar, San Esteban, Salcedo, San Emilio, Sugpon, Suyo ken Alilem, Sta. Lucia, Santiago, Sta. Cruz, Santa, Narvacan, Tagudin ken Candon City.

Nagbanduria met ni Rafanan iti Magsingal, Sta. Catalina, San Juan, Sto. Domingo, Caoayan, Sinait, Nagbukel, Burgos, Galimuyod, Banayoyo, Cervantes, Quirino ken Sta. Maria.