Footer

Lugan a nagkarga iti kontrabando, nalibasanna ti police check point

NARVACAN, Ilocos Sur – Nakalibas ti maysa a lugan a mapapati a nagkarga iti kontrabando iti baet ti panangkamat ti patrol car ti polis ditoy itay lawasna.

Nagsagrap ni PO2 Frederick Pascual, 30, naasawaan, residente iti Burgos St., Vigan City iti minor injuries maigapu iti pannakaidungpar ti minanehona a patrol car a Toyota Altis bayat ti panangkamatda iti lugan a masuspetsa a nagkarga iti kontrabando.

Sakbayna, nakaawat ti PNP ditoy iti report manipud iti saan a nagpabigbig nga umili nga adda maipuslit a kontrabando a karga ti maysa a Toyota Fortuner ket nangipasdekda iti checkpoint iti sanguanan ti police station iti Barangay Limmansangan ditoy.

Segun iti report, nagpakaskas ketdi ti lugan a nagpaamianan idi seniasan dagiti polis nga agsardeng.

Kinamat dagiti polis ti nasao a lugan ket idi addadan iti Sulvec, linabsan ni Pascual ti dua a lugan iti sanguananda ngem napukawna ti kontrol ti manibela a puon ti nakaidungparan ti patrol car.

Nangipatulod dagiti polis iti alarma iti kabangibang a police station ngem nakalusot ti nasao a lugan. Saan met a naala ti polis ti numero ti plaka daytoy.

Nadadael ti akinsango ken akinlikud a tawa ken windshield ti patrol car.

Comments are closed.