Footer

Rafanan mangipila iti protesta kontra Savellano iti Comelec

VIGAN CITY – Kinuna ni naabak a gubernatorial candidate Efren “Rambo” Rafanan a mangipila iti protesta tapno matunton ti napudpudno a napasamak iti eleksion.

Kinuna ni Rafanan a “…kas kandidato, surotek met ti wagas iti proseso” idinto nga inyunay-unayna a “no ti linteg, adda ti namnamaem a pannakasaurmo, pannakasuitikmo ket saan a diay pudpudno a napasamak ti adda a naaramid, we can explore avenues tapno kamatentayo ti pudpudno a napasamak.”

Improklama ni Comelec Provincial Election Supervisor Joel Gines iti sardam ti Mayo 16 dagiti nangabak a kandidato manipud iti kinadiputado iti dua a distrito  ti probinsia, gobernador, bise gobernador ken dagiti bokal, kalpasan ti tabulasion dagiti certificate of canvass iti uneg ti session hall ti sangguniang panlalawigan.

Karaman a naiproklama a nangabak a gobernador ni Vice Gov. Deogracias Victor “DV” Savellano a kinabalubal ni Rafanan para gobernador iti probinsia.

Sakbayna, kinuestionaran ni Atty. Jessie Emmanuel Vizcarra, abogado ti oposision, ti resulta ti eleksion iti sumagmamano nga ili ken siudad gapu iti alegasion a kaadda iti iregularidad iti panagbilangan.

Sakbay ti proklamasion, impetteng ti agsumbangir a kampo nga isuda ti nangabak iti eleksion.

Nagsao pay ni Governor ken senatorial candidate Luis “Chavit” Singson iti radio a kas maibasar kadagiti eleksion returns a naawatda, ni Savellano ti nangabak a gobernador.

Imbatad met ni vice governor-elect Jeremias Singson a naurnos ken natalna ti kalkalpas nga eleksion, kasungani ti inwaragawag ni Rafanan nga adda napasamak nga iregularidad.

“… Amin a presinto ket addaan iti watchers ti agsumbangir a partido, so from the campaign period to the polling places agingga kadagitoy ket nakataltalna met,” kinuna ni Singson.

Mainaig iti mapapati a pannakapasardeng ti panagbilangan iti butos iti Candon City, kinuna ni Bokal Singson a saan a husto ti ipabpabasol ti kampo ni Rafanan.

“… No adda man kasdiay a situasion, (ti legal matters), let us file or go to the appropriate authority maipanggep iti aksion ti maysa a Comelec officer but we should not disturb the proceedings,” kinuna pay ni Singson.

Ngem kinuna ni Rafanan a saan a ti “posision a kinagobernador ti kamkamatenna a kas kandidato no di tuntuntonenna ti napudpudno a kananakem dagiti tattao ken pudno a napasamak” isu a konsultaenna ti abogadona ket mangipila iti protesta “by way of a recount iti Comelec.”

Iti opisial a resulta ti Comelec, nakagun-od ni Savellano iti 131,264 a butos idinto a 132,656 ken ni Rafanan wenno iti diperensia a 1,392 a butos.

Inlupek ni Savellano ni Rafanan iti Cabugao a baluartena babaen ti butos a 10,563 maikontra iti 4,581 laeng a butos ni Rafanan wenno iti diperensia a 5,982 a butos.

Tinarayan met ni Rafanan ni Savellano iti Sta. Catalina babaen iti 3,205 a butos. Nakabutos ni Rafanan iti 4,921 maikumpara iti 1,716 laeng ti butos ni Savellano.

Kinuna ni Bokal Singson nga adu dagiti Lakas a naabak ket no adda inuulbod a napasamak, nangabakda koma aminen.

“Dagiti naabak a Lakas, they accepted their defeat. Kasta koma met ni Rambo…,” kinuna pay ni Singson.

Ngem kinuna ni Rafanan nga “agsaritaak tapno kasta madepdep ti agus ti rikna dagiti amin a kailiantayo, … ket kas maysa a lideryo, intayo tuntonen daydiay namnamaentayo a legal a wagas tapno iti kasta rummuarto met laeng ti kinapudno.”  

Nupay kasta, indagadag ni Rafanan ti panagkalma dagiti suporterna agsipud ta “diak kayat ti biolente a wagas a panangtunton nupay ti sangaprobinsiaan ammoda a ni Rambo Rafanan ti nangabak.”

Comments are closed.