Footer

Apay a di mangasawa ti padi a katoliko?

KASLA dadael a plaka a paulit-ulit. Saludsod a no mabalin uray saanen a nasken a sungbatan. Ngem nasken met tapno malawlawagan ti isyo a pangdadael dagiti managbarsak iti nabunga.

No immula ti bukel iti nabato a daga, agtubo daytoy ngem saan nga agbayag sa manglaylay. Kapadana dagiti naimula iti igid ti kalsada a nalabsan dagiti tumatayab ket tinuktokda a kinnan.

Naited iti padi a Katoliko ti amin a panawen nga agpanunot sakbay a naordinan. Napalubosan nga agbiag iti ruar ti seminario iti sumagmamano a bulan tapno maaddaan iti nawaya a kapanunotan ken rikna no akseptarenna ti bokasion a naikumit kenkuana. Iti pannakaordinna, inawatna metten ti saanna a pannakiasawa.

Sakbay ti ordinasion, mailawlawag kenkuana daytoy:

“Kayatko koma nga awan iti pakaringgoranyo. Asikasuen ti awan asawana dagiti banag a maipapan iti Apo gapu ta kayatna nga ay-aywen ti Apo. Ngem asikasuen ti adda asawana a lalaki dagiti banag iti lubong ta kayatna nga ay-aywen ti asawana, iti kasta, mabingbingay ti kapanunotanna…” (1Cor 7:32-34)

Iti Katolisismo, ti saan a panangasawa ket maysa a wagas a panangtengngel ti padi iti bukodna a bagi. Ta asinoman a dina ammo a tenglen ti bagina, maiyaw-awan, siempre! Kasla daydiay bukel a naimula iti nabato a daga nga idi nakatangkayagen ti init ket nanglaylay ken natay; kasla daydiay naimula iti igid ti dalan, nga idi nalabsan ti tumatayab ket tinuktoknan ti bukel.

Iti Mateo 19: 11-12: “…Saan nga agpaay daytoy a pannursuro iti tunggal maysa, no di laeng kadagiti pakaitedanna. Ta nadumaduma ti gapu ti saan a panagasawa dagiti lallaki: adda di mangasawa ta naiyanakda nga adda pagkurangan iti kinalalakida; adda met dagiti di mangasawa ta nakaponda, ket kadagiti dadduma, gapu iti panagserbida iti Pagarian ti Langit. Ti makatungpal daytoy a pannursuro, awatenna koma…”

Naglawag ti kinuna ni Jesus iti pannursurona. Adda specific a pakaitedan ti pannursuro a di panangasawa ti lalaki. Ngamin, agserbida iti Pagarian ti langit.

Ta ti lalaki nga agserbi iti Pagarian ti langit, santo mangasawa, magudua ti kapanunotanna ta pagserbianna nga agpadpada ti langit ken ti asawana agraman dagiti annakna. Kasla agas-asisaw iti langit ken daga!

No saan a mangasawa, siempre, maymaysa laeng ti inna pagserbian, ti Pagarian ti langit.

Ket agsipud ta ti padi a Katoliko ket agserbi iti Pagarian ti langit, nasken ngarud a saan a mangasawa tapno saan a magudua ti bagina. Saan a magudua ti panawenna ken aramidna. Tapno maymaysa laeng ti inna pagserbian, ti Pagarian ti langit.

Ta no mangasawa ti padi, ket pagserbianna ti Pagarian ti langit ken ti asawana, magudua ti bagina. Posible pay a dakdakkel ti panagayatna iti pamiliana ngem iti panagserbina iti Pagarian ti langit.

Ta no baybay-anna met ti asawa ken pamiliana ket ipamaysana ti panagserbina iti langit, maakusaran iti panagbaybay-a ken saan a maikanatad nga aramid.

No met saan a one hundred per cent ti panagserbina iti Pagarian ti langit, saan ngarud a naan-anay dayta a panagserbi.

Isu nga adda daytoy a pannursuro a para laeng kadagiti pakaitedanna, dagiti mayat nga agpadi!

Saan laeng a maminggasut a daras a damagenda iti agpadi sakbay a maordinan no sisasagana met laeng a mangawat iti bokasionna, no naawatanna met laeng ti pammilin a dina panagasawa. No inawatna ti bokasion ket naordinan, inawatna metten ti pammilin a saan nga agasawa.

“Surotendak!” kuna ni Jesucristo iti inna panagserbi iti Pagarian ti langit.

Nangasawa aya ni Jesucristo? Saan!

Kasta met ngarud ti padi a sumurot ken Jesucristo. Nasken a saan a mangasawa tapno naan-anay ti inna panagserbi iti Pagarian ti langit, tapno saan a magudua ti bagina.

Ket ti padi a Katoliko, kalpasan nga inawatna ti bokasionna sa kalpasanna, nangasawa, saanna laeng nga inang-angaw ti bokasion ti kinapadi no di pati panagserbina iti Pagarian ti langit. Ngarud, ibilang isuna a bukel a naimula iti nabato a daga wenno iti igid ti kalsada.

Naglakaan, nagwayaan nga ibaga iti Father Rector (mangimaton iti seminario) a dimo kabaelan nga awaten ti bokasion. Dengggennaka met ken maawatannaka.

Naglakaan nga ibaga: ti panagbalin nga ulidan nga ama, kas umili, kas mannurat wenno ulidan iti aramid, sao ken panunot ket maysa met a naindaklan a wagas iti panagserbi iti Pagarian ti langit.

Comments are closed.