Footer

Bersamin, naiproklamar a gobernador iti Abra, para congressman, awan pay nangabak

BANGUED, Abra – Kalpasan ti 20 a tawen, naputed ti panagturay dagiti ag-Valera kalpasan nga inabak ni Eustaquio “Kit” Bersamin ni Bangued Mayor Chita “Ching” Valera iti kinagobernador ditoy.

Improklamar ti Commission on Elections-Abra ni Kit Bersamin, kabsat daydi napapatay a Diputado Luis ‘Chito’ Bersamin, a nangabak a gobernador iti probinsia kalpasan a nakabutos daytoy iti 59,557 kontra iti 37,424 a butos ni Valera, wenno iti diperensia a nasurok 22,133 a butos.

Improklamar ti provincial board of canvassers a nangabak ni Bersamin gapu ta saanen a makakamat pay ni Valera uray no butosna amin ti aggapu iti Tineg a saan pay a nabilang gapu iti kaudian a pammaltog a naisayangkat iti daytoy nga ili.

Kabayatanna, agtultuloy pay laeng ti tension iti nagbaetan da congressional bets Lagayan Mayor Cecilia Luna ken Governor Vicente “Vicsyd” Valera gapu iti panagpinnabasol iti agsumbangir iti mapapati nga iregularidad iti eleksion.

Addan butos ni Luna a 33, 374 idinto a 32,637 ti butos ni Valera wenno iti 767 butos a diperensia. Nakagun-od met ni Molina iti 12,307 a butos, ni Gil iti 17,645 a butos ken 20 a butos ken ni Siguera.

Agdagup iti 2,982 ti registered voters iti Tineg ket agpannuray iti resulta ti eleksion ditoy no sino ti mangabak a congressman iti lone district ti probinsia.

Maipalagip a naisardeng ti panakabilang ti butos iti Tineg kalpasan a pinaltogan ti maysa a gunman ni Brenda Crisologo, asawa ni mayor Edwin Crisologo kabayatan ti pannakabilang ti butos. Nakalasat ni Crisologo ngem nagudas ti gunman idi napaltogan iti panaglibasna.

Iti kinabise gobernador, umun-una pay laeng ni Jun Veronia babaen ti butos a 37,619, sarsarunuen ni Ramon Puruganan iti butos a 34,984, ken maikatlo ni Marlyn Damasin iti butos a 6,017.

Saan pay a naiproklama ni Veronia ta maur-uray ti resulta ti panagbilangan iti Tineg.

Iti pannakaisurat daytoy, naiproklamaren dagiti nangabak a bokal iti umuna a distrito, da Nancy Lupang, Edgardo Flores, Jonathan Veronia ken Elmer Gayaw. Iti maikadua a distrito da pay laleng Jocelyn Bernos ken Allan Brix Batsiller dagiti naiproklamar.