Footer

Chess gold medalist iti Palaro, makisalip iti Thailand

CANDON CITY – Ti panagkampeonna iti chess iti pannakisalipna iti Thailand ti sumaruno a puntiria ti chess wizard a tubo ditoy.

Sakbayna, naminsan pay a pinaneknekan ni Generose Razo nga isu ti reyna iti daytoy nga ay-ayam iti pagilian kalpasan nga inyalatna ti balitok a medalia iti nabiit pay a Palarong Pambansa a naangay idiay Koronadal, Cotabato City idi Abril 22-28 daytoy a tawen.

Gapu iti panangitag-ayna iti siudad iti Candon, impatalged ni Mayor Allen Singson a mailatangan iti budget ti pannakipartisipar ni Razo kas mangibagi iti Filipinas iti 8th Asean Age-group Chess Championship a maangay idiay Pattaya Thailand inton Hunio 13-22, 2007.

Saan a daytoy ti damo a panagturong iti ballasiw-taaw ni Razo tapno makipartisipar iti torneo ti chess. Itay nabiit, imbagianna ti Filipinas iti naangay a chess championship idiay Singapore.

Ni Razo met laeng ti nangiyalat iti balitok a medalia iti paay-ayam ti Ilocos Region Athletic Association ken iti Mini-Olympics competition a nakipartisiparan iti 13 a probinsia ken siudad a naangay iti daytoy a tawen idiay Vigan City.

Kinuna ni Razo nga aramidenna amin a kabaelanna tapno makaiyawid iti medalia iti paay-ayam ti chess iti Thailand.

Comments are closed.