Footer

Mapapati nga iregularidad iti eleksion: itudoyo no ania nga ili – Chavit, Jerry

VIGAN CITY – Nangiwayat koma nga umuna dagiti papadi iti inbestigasion tapno maberipikar ti kinapudno ti alegasion ti iregularidad iti eleksion, segun iti dua a teddek ti politika iti probinsia.

Kinuna ni Gov. Luis “Chavit” Singson ken vice gubernatorial-elect Jeremias “Jerry” Singson nga itudo koma dagiti papadi no ania nga ili ti nakapasamakan ti iregularidad tapno maberipikar no husto agsipud ta “makadadael laeng iti probinsia dagiti damdamag manipud kadagiti naabak”.

“Itudoda daydiay ili, kuyogentayo amin tapno makitatayo no asino ti agsasao iti pudno wenno saan,” kinuna ti gobernador idinto nga innayonna a “ti report dagiti naabak, kitaenda (papadi) nga umuna antesda nga aksionan.”

Kinuna ti senatorial candidate a “dagiti naabak, libreda latta ti agsarita, ngem dagidiay ag-conclude, daydiay ti madi no awan ti beripikasionna (ket) “masapul a beripikarenda no adda kinapudnona ta ti madadael ti probinsiatayo.”

Kinuna met ni Bokal Singson nga iti biangna, nadalus ti kalkalpas nga eleksion ta “awan ti napasamak a pinnatay, wenno riribuk, intarayda a balota” ket “napaneknekantayo amin dagita ta adda dagiti poll watcherstayo, adda broadcast media.”

Dinakamat pay ti bokal nga idi arinunos ti 1960s-70s, tunggal eleksion, blacklisted ti Ilocos Sur ken adda iti babaen ti kontrol ti Comelec ket “nabayagtayo nga inat-atur daydiay a nagan ti probinsiatayo” sa “adtoy ti statement dagiti papadi, nadagsen ti statement, namantsaan manen ti probinsiatayo.”

Kinuna ti bokal nga imbatad pay ni Fr. Avila a nadalus ti pannakaisayangkat ti eleksion iti Candon City ket “takderanna dayta.”

“We should have given the benefit of the doubt iti laeng sumagmamano a nakitada a madi didiay election returns ta adda met makuna a human error,” kinuna ti bokal idinto nga inyunay-unayna a “very minimal daydiay” ket saanna nga apektaran ti resulta ti eleksion.

Kinuna pay ti bokal nga iti inwaragawag dagiti papadi a sapasap a panagsuitik, “kasla nakadugdugyot la unayen ti eleksion a naaramiden” idinto a “saan met a kasdiay.”

Kabayatanna, kinuna ti gobernador a mayat a pabilang manen dagiti butos.

“Uray maminsangapulo a bilangentayo, baka ad-adunto pay ti diperensia,” kinuna ti gobernador.

Innayon ti gobernador a nabayag ti proseso ngem “kayatko a papaspasan no adda binnilang tapno awan ti masasaoda.”

Kinuna ni Bokal Singson nga apresiarenna ti statement manipud iti asinoman, “uray asino nga NGO, nangruna dagiti papadi ket impatangatangna laeng “ti sakit ti nakemko ta nadadael ti nagan ti probinsiatayo a kinailalaan nga inay-aywanan ta saan met a pudno”.