Footer

Nagkadua a rupa ti pagilian

Itay nabiit, nairaman ti pagiliantayo kadagiti nabutosan para iti 14 a baro a kameng ti United Nations Human Rights Council (UNHRC).

Maikatlo a kangatuan a butos ti nagun-od ti pagiliantayo iti eleksion iti daytoy a panagpailayonna para iti sabali manen a tallo a tawen a terminona iti UNHRC.

Kas ninamnama, inaramat dagiti agtuturay ti gobierno a nangibatad a daytoy a panagballigi ti pagilian ti mangipakita iti dakkel a panagtalek ti internasional a komunidad iti commitment ti pagilian iti kalintegan a pangtao.

Maysa a bindikasion ti pannakabutos ti pagilian nga agtugaw manen a kameng iti UNHRC para iti administrasion Arroyo gapu iti tignayna nga umaddang ti sangalubongan nga agenda iti panangtagiben ken panangsalaknib iti kalintegan a pantao, kinuna pay ti maysa nga opisial ti turay iti sanguanan ti napigsa nga oposision manipud kadagiti civil society groups iti pannakailayon ti Pilipinas nga agkameng iti UNHRC agsipud kadagiti alegasion iti naipanurok a pannakasalungasing iti kalintegan dagiti umilina, kas kadagiti mapapati nga extra-judicial a pammapatay a ti militar ti maitudtudo a nagisayangkat.

Uray ti Estados Unidos ken ti European Union, krinitikarda ti pagilian iti napalabas gapu iti mapapati a dumakdakes a rekordna iti panagsalungasing iti human rights.

Iti reportna iti human rights council, inakusaran pay ni UN Special Rapporteur Philip Alston ti gobierno gapu iti mapapati a kaawan maaramidna kadagiti extrajudicial a pammapatay a maitudtudo a ti militar ti akin-aramid.

No patien dagiti opisial ti turay a maysa a bindikasion ken panagtalek ti internasional a komunidad iti pagilian iti rekordna iti kalintegan a pantao, dakkel a biddut dayta.

Aramaten ketdi koma ti Pilipinas daytoy a pannakailayonna iti nasao a konseho ti UN a mangipaneknek kadagiti mangkritkritikar kenkuana a pagpagilian ken grupo a saan a pudpudno dagiti alegasion ken akusasionda.

Maaramidna laeng dayta no mangiwayat kadagiti addang tapno sumardeng dagiti mapaspasamak a pannakapapatay dagiti kameng ti militante a grupo ken dagiti agiwarwarnak. Maysa daytoy ti pannakaisaklang iti hustisia dagiti nagisayangkat kadagitoy a pammapatay, polis man wenno soldado wenno nangato ti akemna iti gobierno.

Agingga iti awan ti madusa wenno maikursong iti pagbaludan, masigurado nga agtultuloy latta dagiti negatibo  a pampanunot dagiti pamilia dagiti biktima, ken suspetsa dagiti grupo ti sibil a sosiedad a sagrado a baka dagiti agisaysayangkat iti pammapatay ket kidkideman ti gobierno dagitoy a maar-aramid agsipud ta awan ti baelna a mangpasardeng kadakuada.

No kastoy nga agtultuloy latta ti pannakalabsing iti kalintegan dagiti tattao iti mismo a pagiliantayo, tirtiris laeng ti panagballigi ti Pilipinas nga agkameng iti nailubongan a konseho ti kalintegan a pantao.

Ta kasano a nainkalintegan nga agtugaw ti pagilian iti konseho a mangsalsalaknib iti human rights no dina pay kabaelan a lapdan wenno pasardengan ti pannakarabrabngis ti kalintegan dagiti umilina?

Comments are closed.