Footer

Narambakan, maika-2 anibersario ti Pluma ni Bucaneg

CANDON CITY – Rinambakan ti Pluma Ni Bucaneg-Young Writers Ilocano Writers Group, gunglo dagiti agtutubo ken agdadamo ken agngayangay a mannurat, ti maikadua a tawen nga anibersariona a naangay iti multi-purpose hall ti kabarbaro a city hall ditoy.

Timmabuno iti nasao a pasken dagiti sumagmamano a mannurat manipud iti La Union iti panangidaulo ni Gumil-La Union president Djuna Alcantara.

Iti ababa a panagsao ni Candon City mayor-elect Allen Singson, kangrunaan a bisita, ginuyugoyna dagiti mannurat a mangirakurak kadagiti napintas a lugar iti siudad tapno maawis a pasiaren dagiti turista.

“Dakayo ti kangrunaan a kabinnadangmi iti panangi-promot iti turismo iti lugartayo. Babaen kadagiti nabileg a balikasyo, maiparangyo iti sangalubongan ti napintas nga aglawlawtayo tapno maawis dagiti turista a pasiaren dagitoy,” kinuna ti mayor.

Malaksid iti mayor, kangrunaan a guest speaker ni Dr. Concepcion Bederio, agdama a director ti DMMMSU-OUS ket inlawlawagna ti baro a kurso iti pagadalanda partikular ti Iluko creative writing.

Naisayangkat pay ti on-the-spot writing contest a nagpartisiparan dagiti nadumaduma a nagatendar manipud ti IKWC ti Radio RNT ti Tagudin, Ilocos Sur.

Nagsangaili iti nasao a pasken da Rodgerry Rodriguez, presidente ti Pluma ni Bucaneg, Eduard Britos, bise presidente, Joe Somera, auditor, ken dadduma pay a mannurat a pakairamanan toy nagsurat.