Footer

Polis: Gun for hire ti nangpatay iti mayor, konsehal

BACARRA, Ilocos Norte – Maysa a task force ti binuangay ti polis idinto a nangitanggaya ti gobierno munisipal ditoy iti gunggona para iti madagdagus a pannakaitudo ti akin-utek iti pannakapapatay ti nangabak a mayor ken maysa a konsehal ditoy.

Pinaltogan ti maysa a mapapati a gun for hire da Mayor Philip Velasco ken ni Konsehal Marcelo Abaya bayat ti yaatendarda iti farmers’ festival iti auditorium iti karabian ti Mayo 21 ditoy.

Nasugatan ni Velasco iti tengnged ken baba ti kilikilina idinto a napuntaan ti tian ni Andaya.

Pimmusay dagiti dua bayat ti pannakatamingda iti Ilocos Norte Provincial Hospital iti Laoag City.

Nabigbig ti pimmaltog a ni Marco Cabasag. Positibo iti pulbora ti imana iti paraffin test nga insayangkat ti polis kenkuana.

Kanaig daytoy, ingngato ti task force iti P150,000 ti gunggona nga intanggayana para iti aniaman nga inpormasion para iti pannakatiliw dagiti suspetsa.

Kuna ti polis ditoy a posible a saan a maymaysa ti suspek ket adda dagiti kakaduana a nangisayangkat iti pammapatay.

Kabayatanna, kinuna ni Provincial Regional Director Police Chief Supt. Alfredo Bataoil a maysa a gun for hire ni Cabasag.

“Ipakita ti pannakaiwayat ti pammapatay a trabaho ti natangdanan a pumatay,” kinuna ni Bataoil idinto nga innayonna a mangibaon iti kanayon a seguridad iti pamilia ni Velasco.

Segun iti inisial nga inbestigasion, nakatugaw ni Velasco ken dadduma pay nga opisial iti sanguanan bayat ti Farmers’ Festival iti auditorium idi immasideg ti suspek ket pinaltoganna ni Velasco.

Gapu kadagiti kanalbuong, nagkaribuso dagiti tattao.

Napuntaan ti ima ni provincial board member Shirley Ong iti nayaw-awan a bala. Uppat pay ti nasugatan, da Josefina Bermudez, Analyn Fabillaran, Josefina Galapa ken Ron-ron Lungabon gapu iti karibuso dagiti tattao a nagsipakni gapu kadagiti kanalbuong.

Napapatay ni Cabasag babaen dagiti seguridad ti mayor bayat ti panaglibasna.

Nakarekobre dagiti polis iti cal. 45 ken Nokia 1100 cellphone iti ikut ti suspetsa ket rinugianda a sukimaten dagiti mensahe ken tawag a nailista iti selpon sakbay ti pammapatay.

Ni Velasco ti maikatlo a mayor iti Ilocos Norte a napapatay manipud idi 2004, a pakairamanan da Mayor Rogelio Pambid ti Marcos ken Mayor Eleuterio Mabanag ti Vintar.