Footer

Raya ti namnama iti nalidem a tangatang ti politika

Kadagiti taga-Pampanga, ibilangda a milagro ti panangabak ni Fr. Eddie Panlilio a gobernador iti probinsiada. Kadagiti met dadduma, bileg ti tattao ti nangitag-ay ken ni Fr. Panlilio a gobernador iti baet arig kasla abut ti dagum ti lusotanna iti kampaniana a mangited iti Pampanga iti sabali a klase ti liderato, maisupadi iti intanggaya ti nakatugaw a gobernador a naakusaran iti anomalia ken ti maysa a bokal nga asawa ti didiosen ti illegal a sugal.

Kas maibasar iti opisial a resulta ti panagbubutos manipud iti Commission on Elections, nakagun-od ni Panlilio iti 219,706 a butos. Iti sabali a bangir, nakagun-od ni Lilia Pineda, asawa ni Bong Pineda, ti maitudtudo a jueteng lord iti pagilian, ken incumbent board member iti 218,559 a butos idinto a 210,875 ti nabutos ni Gov. Mark Lapid, anak ni naabak a mayoralty candidate iti Makati City, Senador Lito Lapid.

Risiris ti panagbalubal da Panlilio ken ni Pineda. Sakbay ti pannakabilang dagiti butos iti Magalang, mangab-abak ni Pineda, ngem aglaplapusanan ti butos nga inted dagiti botante iti daytoy nga ili a nakagun-odanna iti 11,095 a butos ken nangdalebanna ken ni Pineda iti 1,147 laeng a butos.

Daytoy ti kabassitan a bilang ti butos a nangabakan ti maysa a kandidato iti Pampanga wenno uray pay iti sibubukel a pagilian.

Iti daytoy a panagballigi ni Panlilio, isu ti kaunaan a padi a Katoliko a mabutosan iti public office iti pagilian.

Ken ni Panlilio, tineggedna ti balligina idinto nga impaganetgetna a “wagas ti Dios daytoy a panawen ti panagbalbaliw ken panagserbi kadagiti parsuana, nangruna dagiti marigrigat.”

Naisalsalumina ken nasam-it ti panagballigi ni Fr. Panlilio a pabutosan a gobernador.

Naiduron laeng a nagkandidato a para gobernador kalpasan nga awan ti mayat a sumango kadagiti nakabalubalna iti politika.

Ngem saan a nakakaskasdaaw no apay nga awan ti interesado a sumango kada Lapid ken Pineda, dua a nabileg a politiko iti Pampanga. Malaksid ti kaaddada iti poder ken kaaliadoda ti agdama nga administrasion, addaanda iti kuarta ken makinaria a kangrunaan a mangitag-ay iti kandidatura ti maysa a politiko.

Ngem kadagiti taga-Pampanga, kayatda ti panagbalbaliw iti probinsiada manipud kadagiti dadauloda iti politika a nagameran iti panagkunniber ken sugal a hueteng.

Nakitada ken ni Fr. Panlilio ti raya ti namnama iti nalidem a tangatang ti politika nga adda pay gundaway nga agbaliw ti probinsiada.

Ken ni Panlilio, arigna naipit iti nagbaetan ti dua a bato kadagiti panawen a panangamirisna no ania ti surotenna: sumrek iti politika tapno isu ti mangidaulo kadagiti kailianna iti pannakaiwayat ti panagbalbaliw iti probinsiada wenno agtalinaed iti ruar ti politika ket agserbi laeng kadakuada babaen ti espiritual a panangidaulo.

Rimmimbaw kenkuana ti arungaing dagiti kailianna ket idi Marso 25, nagbakasion iti pagrebbenganna iti simbaan ket imbaskagna ti iseserrekna iti politika kas alternatibo a kandidato a pagpilian dagiti botante iti Pampanga.

Maiyarig iti agsang-at iti bantay ti iseserrek ni Panlilio iti politika.

Umuna, awan ti pammatibker wenno suporta ti Simbaan iti itatapogna iti politika.

Maikadua, awan kuarta wenno makinaria a mangiduron kenkuana iti panagkampaniana.

Maikatlo, kasangona ti dua a nabileg a politiko a kaaliado ti agdama nga administrasion.

Iti panaglabas dagiti aldaw, inanusanna ti namalaybalay iti panangipresentarna ti bagina a kandidato dagiti napanglaw ken maipapaigid iti biag.

Ditoy a naawisna ti imatang ken rikna dagiti kailianna.

Nagsangpet dagiti tulong manipud kadagiti makurkurangan iti biag — manipud iti bagas, tisirt, polieto ken panangikampaniada kenkuana.

Manipud iti sumagmamano laeng a nagboluntario a tumulong iti kandidaturana, kalas simmuyop a lobo ti iti aganay 30,000 a bilangda a pakairamanan ti 33 nga abogado a nangipatalged iti tulongda iti aniaman a sanguenna a legal nga isyo iti panagkandidatona.

Dagitoy ti nagbantay ken nangsalaknib kadagiti balota, di nangpanaw kadagiti urna iti uneg ti pasdek ti munisipio, nakipagpuypuyat ken nabisbisinan bayat ti pannakabilang dagiti butos tapno masigurado a saan a mabaliwan wenno maipanaw iti kaltaang ti rabii.

Milagro! People Power!

Ngem daytoy ti nalawag: no agtignay ken agtimek dagiti umili a sangsangkamaysa, sarutenna uray ti katangkenan nga armas dagiti nabileg ken naturay.

Daytoy ti naisalsalumina ken pudpudno a ladawan ti demokrasia iti pagilian.

Ala, nangato ti namnama dagiti umili ken ni Among Ed, kas birngasda ken ni Fr. Panlilio. No makapudno iti naipabaklay kenkuana a pagrebbengan, panawento ti makaibaga.

Ngem addakam iti likudam, Fr. Panlilio.