Footer

I. Sur May 14 elections, katalnaan, kaurnosan: Cong. Eric

CANDON CITY – Sabali pay a Singson ti nangsalaknib iti integridad ti eleksion iti probinsia.

Kinuna ni congressman-elect Eric Singson a ti kalkalpas nga eleksion ti katalnaan ken kaurnosan no maikumpara kadagiti napalabas nga eleksion iti Ilocos Sur.

“The religious sector is also entitled to its own opinion, ngem personally, compared to past elections, nataltalna ita… awan ti kinadamsak a napasamak ditoy probinsiatayo, ket mabalintayo nga itangsit daytoy,” kinuna ti nailayon a diputado.

Kinuna pay ti diputado a naikabil ti probinsia iti dakes a langa gapu kadagiti di mapaneknekan nga alegasion iti iregularidad iti pannakaisayangkat ti eleksion iti probinsia kas linaon iti waragawag dagiti papadi idi May 21.

Kinuna ti diputado nga awan ti nairekord a complaint wenno iregularidad manipud iti barangay, municipal ken provincial levels idinto nga impaganetnetna nga addaan amin a kampo kadagiti poll watchers a nangsaksi iti panagbilangan.

Kinunana pay a maigapu iti waragawag dagiti papadi, napunas a naminpinsan ti natalna a panakaisayangkat ti eleksion iti probinsia ket saanen a maibabawi pay.

Iti statement a pinirmaan ni Fr. Cosmenio Rosimo, presidente ti Nueva Segovia Priests Assembly ken ni Archbishop Ernest Salgado, indeklarada ti panangkondenarda iti “narugit a pannakaisayangkat iti eleksion iti probinsia gapu kadagiti mapapati a nakaro a panaggatang iti butos, panaglako iti butos ken opponent-buying kadagiti awan kasangoda a kandidato.

Indagadag pay dagiti papadi ti pannakabilang manen dagiti butos tapno “masigurado ti pudno ken hustisia kasta met iti panagtalek iti proseso ti eleksion.”

Ngem linagidaw da Gov. Luis “Chavit” Singson ken ni vice governor-elect Jeremias “Jerry” Singson ti waragawag dagiti papadi idinto nga inyunay-unayda a nagimbestiga koma dagitoy no adda kinapudnona wenno awan ti alegasion ti iregularidad iti eleksion.

“Itudoda daydiay ili, kuyogentayo amin tapno makitatayo no asino ti agsasao iti pudno wenno saan,” kinuna ti gobernador sana innayon a “masapul a beripikarenda no adda kinapudnona ta ti probinsiatayo ti madadael.”

Kinuna ti gobernador a mayat a mabilang manen dagiti butos ta “uray maminsangapulo a bilangentayo, baka ad-adunto pay ti diperensiana” sana impaganetget a “kayatko a papaspasan no adda binnilang tapno awan ti masasaoda.”

Kinuna met ni Bokal Singson nga iti biangna, nadalus ti kalkalpas nga eleksion ta “awan ti napasamak a pinnatay, wenno riribuk…” ket “napaneknekantayo amin dagita ta adda dagiti poll watchers, adda broadcast media.”

Kinuna ti bokal nga iti inwaragawag dagiti papadi a naipanurok a panagsuitik, “kasla nakadugdugyot la unayen ti eleksion a naaramid” idinto a “saan met a kasdiay.”

Kabayatanna, nangipila ni naabak a gubernatorial candidate Efren “Rambo” Rafanan iti protestana maikontra ken ni governor-elect Deogracias Victor “DV” Savellano.

Iti protestana, dinakamat ni Rafanan dagiti mapapati nga iregularidad iti eleksion iti siudad ti Vigan ken Candon ken dagiti ili ti Cabugao, Narvacan ken San Vicente.

Ngem kinuna ni Savellano a sisasagana iti protesta iti eleksion ni Rafanan ta mapatalgedan nga isu ti nangabak iti eleksion.

Daytoy ti maikadua a gundaway a nagsango para gobernador da Savellano ken ni Rafanan.

Idi 2001, inabak ni Savellano ni Rafanan iti baet a 23,000.

Iti eleksion itay Mayo 14, nakagun-od ni Savellano iti 132,656 a butos idinto a 131,264 ti butos ni Rafanan wenno iti baet a 1,392 a butos.

Comments are closed.