Footer

Lalaki, napaltogan iti uneg ti videokena

CANDON CITY – Napaltogan ti maysa a lalaki iti uneg mismo iti videoke bar a kukuana babaen dagiti dua a kustomer idiay Paras ditoy.

Pinaltogan ti di nabigbig a dua a lalaki i biktima a ni Viviano Cortado y Gabayan, 55, akinkukua ti Survivor Videoke Bar, ken residente iti barangay Paypayad ditoy met laeng siudad.

Iti inisial nga imbestigasion ti polis, naginom dagiti dua a suspek iti nasao a videoke bar ket idi pumanawdan, siningir ti biktima ida a puon ti nagpudotan dagitoy.

Pimmanaw apagbiit dagiti suspek ngem nagsublida a nakalugan iti motorsiklo ket bayat ti pannakipatangda manen iti biktima, mapapati a bigla nga inasut ti maysa kadagiti suspek ti paltogna a 9mm ket pinaltoganna ti biktima.

Naitaray ti biktima iti Candon City Hospital sa naiyalis iti ospital idiay San Fernando, La Union gapu iti grabe a sugatna.

Naglibas dagiti suspetsa ket birbiroken ita dagiti polis.

Comments are closed.