Footer

Panagawan-panagadda ti koriente, saan a lumagto ti makunsomo: ISECO

SANTIAGO, Ilocos Sur – Saan nga agpayso a lumagto ti tayyek ti kontador no agawan-agadda ti koriente.

Daytoy ti inlawlawag ni Engr. Fred Jacob, technical services manager ti Ilocos Sur Electric Cooperative, bayat ti pannakiuman ti media kenkuana itay nabiit, kanaig ti masansan a panagpukaw-panagadda ti koriente iti probinsia a serserbian ti nasao a kooperatiba ti elektrisidad.    

Kinuna ni Jacob a maysa a makagapu iti brownout ti panagtutudona nga adda kakuyogna a kimat ken gurruod.

Inlawlawagna a no adda matamaan ti kimat a linia, ngumato ti current amperes ket agsipud ta adda limitasion dagiti sub-stations, sumobra daytoy nga isu ti pakaigapuan ti panagiddepna.

“Malaksid iti daytoy, adda dagiti dadduma a consumerstayo a dida kayat a mapukanan ti kayo ti arubayanda ket no simmagid ti sanga iti linia ti koriente, agpangato ti ampere, sumobra ti limitasion ti breaker a pakaigapuan ti panagadda ken panagawan ti koriente,” kinunana.

Dinakamat pay ni Jacob ti kinalakay dagiti insulators ket no nag-leak daytoy, ag-ground isu a ngumato ti amperes a pakaigapuan ti panagtrip ti koriente.

Pinaglibakan ni Jacob a lumagto ti tayyek ti kontador no kellaat nga agawan-agadda ti koriente idinto nga inyunay-unayna a nakametro ti gatgatangen ti kooperatiba nga elektrisidad manipud iti National Power Corporation ken Transco.

“ No pudno nga agtayyek ti kontador iti panagiddep-panagadda ti koriente, dumakkel koma metten ti makonkonsumo a koriente ti kooperatiba,” panangilawlawag ni Jacob.

Comments are closed.