Footer

Rebel returnee, pinapatay maatap dati a kakaduana

GALIMUYOD, Ilocos Sur – Maysa a dati a kameng ti New People’s Army ti pinapatay dagiti armado a tattao a mapapati a kameng met laeng ti rebelde a grupo iti uneg ti paggigiananna a balay ditoy itay lawasna.

Iti report manipud iti polis ditoy, nainaganan ti napapatay a ni Richard Doque y Gambol, alias Ka Jong, 33, naasawaan ken residente iti barangay Calumbaya, rebel returnee, iti pagtrabahuanna a pagtaengan iti Calongbuyan ditoy iti agarup alas siete y media ti rabii babaen dagiti dua nga armado a tattao.

Saan a nabigbig dagiti dua a suspek ngem mapapati a kamengda ti NPA.

Saan a kinumpirmaran ti nasao a rebelde a grupo no isuda iti nangisayangkat iti pammapatay.

Saan met nga ammo no ania ti motibo ti pannakapapatay ti nasao a rebel returnee.

Segun iti inisial nga inbestigasion, agbugbuggo iti imana ni Doque iti kusina tapno mangan koman idi simrek lattan ti dua nga armado a suspek sada pinaturongan ti biktima ken pinilit a kumuyog kadakuada.

Sumagmamano a minutos, nangeg laengen ti kabbalay ti biktima dagiti nagsasaruno a putok.

Nagpaarayat ti asawa ti biktima kadagiti kaarrubada ket idi dumteng dagiti polis, sinawarda ti biktima.

Nasarakanda daytoy iti amiananen a paset ti balay a nagsagrap iti sugat iti nadumaduma a paset ti bagina.

Kalibre 45 ti naaramat iti pammapatay kas maibasar kadagiti kapsula a nasarakan iti nakapasamakan ti krimen.

Madama ti panagpalutpot dagiti polis no pudpudno a kameng ti NPA dagiti pimmatay ken ni Doque.

Comments are closed.