Footer

Sampol ti kasapulan

Maysa a non-government organization ditoy amianan ti nagkuna a kasuanda dagiti kandidato a nagilansa kadagiti campaign postersda kadagiti kaykayo kabayatan ti panawen ti kampania.

Segun iti daytoy a grupo, nasurok a 25,000 a kaykayo iti igid ti nasional a kalsada ti nalansaan kadagiti campaign posters kabayatan ti panagkampania dagiti kandidato iti baet a maisalungasing daytoy iti paglintegan.

Kinuna pay ti nasao nga organisasion a nakikammayyet iti Provincial Environment and Natural Resources Offices para iti pannakaikkat dagiti nailansa a campaign posters ken paskil kadagiti kaykayo a kuna ti naud-udi a sumrekan dagiti mikrobio a posible a pagtaudan ti sakit ti kayo.

Kasta met a makipatang ti grupo iti lokal a gunglo dagiti abogado iti probinsia tapno tumulongda iti pannakaipila iti kaso maikontra kadagiti nagsalungasing.

Ngem iti paniriganmi nalaklaka nga amang ti agisawang ngem iti aramid. Pinaneknekan ketdi ti kaadu dagiti naipigket a campaign posters kadagiti diding ti balay, alad, parke ken dadduma a lugar a mawidawidan dagiti tattao ken pannakailansada kadagiti puon ken sanga dagiti kaykayo ti saan a panagtungpal ken awan panangipirpirit dagiti kandidato iti linteg.

Iti Metro Manila laengen, dagiti ikkaten a campaign posters dagiti kameng ti Metro Manila Development Authority ket dagus a masuktan iti sabali apaman a nakatallikudda.

Agingga ita, iti baet ti nagkaadu a ballaag ti Commission on Elections a pannakadusa dagiti nagsalungasing iti daytoy a paglintegan, awan uray maysa a naisaklang iti korte. Agbalbalin laeng ti Comelec nga inutil iti sanguanan ti di panangitaltalek dagiti kandidato kadagiti pammilin ken ballaagna.

Ta agdadata ketdi a kinideman ti Comelec ken ti PENRO dagitoy a panaglabsing dagiti kandidato gapu iti kaawan gawayda a mangipakat iti linteg tapno madusa dagitoy.

Iti maysa a bangir, maibilang dayta a panagbaybay-a iti pagrebbenganda gapu iti saanda a panangiyinget iti pannakaipatungpal iti linteg.

Ngem iti sabali a bangir, posible a nagtukiadda agsipud ta sigurado a dakkel a politiko ti mabaddekanda no iyimplimentarda ti paglintegan, ket dida kayat a mapagura dagitoy. Iti probinsia, dagitoy a politiko dagiti didiosen a mamagbalin wenno saan iti maysa nga opisial iti probinsia.

Ngem ala, napintas daytoy a waragawag ti nasao a grupo ta babaen ti panagikkatda kadagiti nailansa a campaign posters, makatulongda a mangpukaw kadagitoy saan a makaay-ayo a makita kadagiti kalsada nasional.

Napimpintas manen no adda kasuanda a kandidato a naglabsing iti linteg tapno makita a saan laeng a para waragawag ti imbagada, tapno maipaneknekda nga awan ti nangatngato iti linteg, nangruna dagiti politiko nga awan panangipirpiritda iti paglintegan ti pagilian.

Ngem ti saludsod: adda met la duri daytoy a mangtungpal iti waragawagna? Kas nakunami: sabali ti sao, sabali ti aramid.

Comments are closed.