Footer

Bang-ar iti nairteng a barukong

IDI 2004, iti Mindanao  ti maysa kadagiti dakkel a nangabakan ni Pres. Arroyo ngem minantsaan ti balligina iti alegasion ti panagsuitik gapu iti pannakaibulgar ti Hello Garci tapes a nakaipalnaadan ti mapapati a pannakipatpatang ti Presidente iti maysa a turayen ti Commission on Elections a mapapati a ni Virgilio Garcillano mainaig iti butosna iti eleksion.

Nagsori ni Pres. Arroyo mainaig iti nasao a pasamak ngem pinaglibakanna nga adda naaramid a panagsuitik iti eleksion.

Dinayyeg ketdi dagiti nagsasaruno a protesta ti pundasion ti turay ni Pres. Arroyo.

Nairusat ti impeachment complaint maikontra kenkuana iti Kamara ngem babaen ti pannalaknib dagiti kaaliadona, saan a dimmur-as daytoy.

Iti simmaruno a tawen, sabali manen nga impeachment complaint ti naidatag iti Kamara. Ngem babaen iti kinaturay ti numero, saan manen a nagballigi ti oposision iti panangisaklangda iti Presidente.

Mapaliiw a nalayawen ti Presidente dagiti tignay a mangpadissaag kenkuana iti turay ngem iti baet ti ipipigsa ti administrasionna, saan nga agpukaw ti alegasion a saan nga isu ti pudpudno a nangabak iti eleksion idi 2004.

Maibilang ngarud a reperendum iti Presidente ti mid-term eleksion a naangay itay Mayo 14 no maiwalinen ti al-alia ti panagpipili idi 2004 ket umaddangen ti administrasionna para iti panagdur-as ti pagilian kalpasan ti krisis a naglasatanna gapu iti pannakabingbingay dagiti umili ken uray dagiti dadaulo dagiti nadumaduma a sektor kas imbunga ti Hello Garci tapes.

Ngem iti pannakaisurat daytoy, agtultuloy latta ti panangilampaso dagiti kandidato a para senador ti oposision kadagiti manok ni Pres. Arroyo iti Team Unity. Iti pannakabilangen ti aganay 80% iti kadagupan dagiti amin a butos, walo a kandidato ti GO, 2 ti Team Unity ken 2 nga independiente ti nairaman iti magic circle. Daytoy ti agdama a trend. Masinunuo a daytoyen ti masurot no awan la ketdi ti dakkel a milagro ti panagbilangan iti espesial nga eleksion a naiwayat iti sumagmamano a probinsia iti Mindanao.

Uray ti Comelec, inwaragawagna payen nga iproklamana ti umuna a 10 a mangab-abak a kandidato agsipud ta saanen a maapektaran dagiti nabatbati pay a butos ti puestoda.

 Ngem kuna ni Abalos nga apektado pay ti maudi a dua puesto iti resulta ti espesial nga eleksion iti Lanao del Sur ken dadduma pay a lugar iti Mindanao, ken iti Maguindanao a nakagun-odan ti Team Unity iti 12-0 kontra iti oposision.

 Iti ngarud espesial nga eleksion iti sumagmamano a probinsia iti Mindanao ti nakaisentroan ti imatang dagiti poll watchdogs, Namfrel, ken dagiti kampo ti agsumbangir a partido. Kas kuna ti tunggal maysa, kasapulan a masaluadan dagiti butos dagiti kandidatoda tapno ti pudpudno a rikna dagiti agindeg kadagitoy a probinsia ti rummuar iti eleksion.

Ta ti pannakaisayangkat iti eleksion ditoy Lanao del Sur,  Lanao del Norte, ken dadduma pay a lugar iti ARRM ti mangpatalged wenno mangduprak iti kredibilidad ti administrasion Arroyo no nangabak babaen iti nadalus wenno narugit a wagas dagiti kandidatona.

Iti umuna a gundaway iti pakasaritaan ti eleksion iti pagilian, nagdudupudop iti Mindanao dagiti poll watch dogs, soldado, dagiti bantay ti oposision ken dadduma pay a sektor tapno siputanda ti pannakaisayangkat ti panagbutos ken nangnangruna ti pannakabilang a nasayaat dagiti butos tapno rummuar ti pudpudno a karirikna dagiti botante.

Adu latta dagiti kapaliiwan ti panaggatang iti butos, pammutbuteng, panagmaniobra dagiti kandidato ken uray dagiti kameng ti poll body ngem iti panagdadarison dagiti agsiput kadagitoy a lugar, dakkel ti nakapukolan dagiti agpangpanggep iti saan a nasayaat tapno maitag-ay dagiti kandidato a kayatda a mangabak.

Imparangarang daytoy a panagtitipkel dagiti nadumaduma a sektor nga adda pay la namnama a  magun-od ti nadalus, natalna ken naurnos nga eleksion iti Mindanao iti baet dagiti tignay ken panggep a pananggamsaw iti kalintegan ken karirikna dagiti umili a mangibutos iti agtuturayda.

Madakamat met ditoy ti panangibasnot ni incumbent Congresswoman Darlene Antonino-Custodio ken ni nalatak a boksingero a ni Manny Pacquiao.

Iti baet a maysa laeng a pangrapisen a babai nga agdagsen iti 90 pounds, tinumba ni Custodio ti boksingero a maibilang a best pound-for-pound boxer iti sangalubongan.

Saan laeng a natumba ni Pacquiao, uray la nagkaradap gapu iti pannakagaborna iti butos ni Darlene.

Ania ti maarisit ditoy?

Saan a gapu ta id-idoluen ti minilion a tattao ni Pacquiao ket kidemandan a butosan iti puesto a tarigagayanna.

Saan a palimed a saan a nagraduar iti haiskul ni Pacquiao gapu iti kinarigat ti panagbiagda.

Ngem gapu iti siglatna iti boksing, nagukkon iti pammadayaw, kinalatak ken kuarta. Isu ti kabaknangan a boksingero iti pagilian. Nakaipatakderen iti mansion, negosio ken endorser kadagiti produkto a nagakupanna iti minilion a kuarta.

Iti panunot siguro ni Pacquiao, umanayen ti tarigagayna a tumulong para iti pagsayaatan ti biag dagiti kalugaranna, ken ti kinalatak ken kuartana tapno bitibiten dagiti kalugaranna.

Nakatuon ti imatangna iti daytoy nga arapaapna ket dina tinaliaw wenno dinengngeg dagiti pammagbaga, pammalagip ken paripirip ti pamiliana ken dagiti nasinged kenkuana.

Ti ketdi arasaas ti administrasion ken politiko ti inikkanna iti atension.

Saanna a nakita, wenno dina kinayat a kitaen, nga adda naun-uneg a motibo ti Malakaniang a nangguyugoy kenkuana nga agkandidato tapno sanguenna ni Darlene Antonino-Custodio.

Dina nasirip a kayat ti turay a tippuogen ni Custodio agsipud ta nainget daytoy a kritiko ti administrasion ket ni laeng Pacquiao ti makita ti administrasion a mabalin a makaibalat ken ni Custodio.

Ita, mabalin a salsaludsoden ni Pacquiao no napanan dagiti mangid-idolo kenkuana ta saanda a binitibit iti pannakiboksingna ken Custodio iti rueda ti politika.

Ngem mabalin nga iti masakbayan, no agared-eden ti lagip, makita ken maamirisna a saan nga imbutos dagiti kailianna, saan a gapu ta dida patpatgen no di ket sinalaknibanda laeng iti narugit a kuko ti politika. Linapdan dagiti kailianna a maikarungukong iti derraas ti politika a namnamaenda a mangdadael ti idoloda a boksingero.

Iti masakbayan, maamiristo ni Pacquiao daytoy ket pagyamanannanto iti dakkel dagiti kailianna.

Sumagmamano laeng dagitoy a pakapalag-anan ti rikna iti sanguanan ti nariribuk, nadara, ken naraira a panagsuitikan iti politika itay napalabas nga eleksion. Kaarig dagitoy ti arbis iti kalgaw, ngem umdasen a mangsagepsep iti tapok ken mangbiag iti maitukit a bukel ti namnama iti sab-ok ti narengngat a daga. #