Footer

Hold-ap gang, nagpullo

MAGSINGAL, Ilocos Sur – Ad-adda manen a dimmagsen ti kaso ti dua a suspetsa ti panagtakaw kalpasan a sabali pay a biktima ti nangitudo kadakuada a nanghold-ap kadakuada.

Binigbig ti biniktimada da Allan Navarro, naasawaan, residente iti Bayubay Norte, San Vicente, Ilocos Sur, ken ni Edel Bauto, 41, naasawaan, agnaed iti Jaen, Nueva Ecija, nga isuda ti nangisayangkat iti panaghold-ap iti uneg ti sementerio ti Sto. Domingo idi Abril 7, Sabado Gloria.

Maipalagip nga iti tengnga ti aldaw, nahold-ap da Felicidad Cabbab, 47, balikbayan, residente iti Villaviciosa, Abra ken ni Lorenzo Alcantara, 34, residente iti Naglaoaan, Sto. Domingo, Ilocos Sur bayat ti panangsarungkarda iti tanem ti kabagianda.

Nakasakas manipud kada Alcantara ken Cabbab ti dua a selpon, 2 a diaket, 1,800 Hongkong dollars, P41,000 cash ken intaray pay dagiti hold-aper ti kabarbaro nga XRM a motorsikloda.

Imbati dagiti hold-aper ti TMX a motorsiklo a mapapati a tinakawda.

Nakadetene da Navarro ken Bauto iti municipal police station ditoy gapu iti sabali pay a kasoda a robbery hold-up iti Bossaoit Hills ditoy a kaduada ni Arturo Mapatac, 41, residente iti Luna, La Union ngem agnaed iti Zone 5 Bantay, Ilocos Sur.

Iti panagimbestiga dagiti polis, daldaliasaten da Edilberto Urmeneta, residente iti San Clemente ditoy, a kaduana ni Mario Anagaran, 29, kalugaranna ti Bossaoit Hills ditoy a nakalugan iti XRM a motorsiklo idi abayen dagiti suspetsa a nakalugan iti XRM a motorsiklo nga awanan plaka sada pinaturongan dagiti biktima iti paltog ken inwaragawag ti hold-ap.

Kinasakas dagiti suspetsa ti selpon ken P5,000 a kuarta dagiti dua sada intaray ti lugan dagitoy.

Intudo ni Urmeneta ni Mapatac a maysa kadagiti nanghold-ap kadakuada idi naaresto daytoy iti illegal a panagikut iti armas iti Narvacan, Ilocos Sur.

Iti nainget a panagpalutpot dagiti inbestigador, innaganan ni Mapatac dagiti dua a kakaduana.

Iti panakiuman-uman ken ni Major Marlo Castillo, hepe ti polis iti Narvacan, kinunana a dagiti nasao a suspek ket responsible iti panagtakawan iti motorsiklo iti umuna a distrito ti Ilocos Sur ken iti probinsia ti Ilocos Norte.

Naammuan pay nga adda safehouse dagiti suspek iti Narvacan gapu ta ditoy segundo distrito ti Ilocos Sur mapapati a pagilaklakuanda kadagiti intarayda a motorsiklo.

Kanaig daytoy, indagadag dagiti polis ti ipapan dagiti nagbalin a biktima ti panaghold-ap iti PNP station ditoy tapno lasinenda no dagiti suspetsa ti nanghold-ap kadakuada tapno mainayon a pakakasuan dagitoy.