Footer

Idakdakkel ti pondo para edukasion

ITI BAET a dimmakkel ti nailatang a pondo para iti edukasion, dumakdakes ti situasion ti edukasion ti pagilian, kuna ti maysa nga autoridad.


Kitaentayo daytoy:

Iti 10 nga ubbing a sumrek iti Grade I, innem ti makakumpleto iti elementaria, uppat ti makaturpos iti sekundaria ken dua laengen ti sumrek iti kolehio.

Iti sabali a pannao, nangato ti dropout rate.

Maitudo a kangrunaan a rason ti panagsardeng dagiti ubbing nga agbasa ti saanda a pannakasurot kadagiti mayadal iti pagadalan gapu ta nakapsutda ti English, Matematika, Siensia, ken Social Studies ken nakapuyda iti reading proficiency.

Ngem apay a nakapsut dagiti agbasbasa kadagitoy nga asignatura?

Umuna, agkurkurang dagiti makabael a mangisuro kadagitoy a subjects.

Iti maysa a panagadal, limtuad nga adu a mangisursuro nangnangruna iti high school, ti agisuro iti English ken Mathematics ken Science idinto a saanda a major kadagitoy a subjects.

Ngem kapilitan ta agpanaw dagiti nalaing a mangisursuro tapno manggedda iti ballasiw-taaw gapu iti nababa a sueldo, naginad a promosion, agkurkurang ken saan a makaay-ayo a workplace kas iti arigna agdidippit nga estudiante, nakipet ken napudot a kuarto, ken agkurkurang a teaching materials, santo pay laeng addada iti babaen ti administrador nga awan ti ammona no di agunget ken agmandar kadagiti mamaestra.

Sabali laeng ti panagbaliwbaliw ti polisia ken kurikulum ti departamento iti panagbaliw met ti liderato. Kas iti pannakaipakat ti continuous progression scheme, bi-lingual instruction (English ken Filipino) ken ti maisingsingasing a pannakaaramat ti English kas medium of instruction.

Iti daytoy a situasion, saan a nakakaskasdaaw a di maapektaran ti kalidad ti edukasion iti pagilian.

Ita a panaglulukat ti klase kasapulan ti 16,390 a mangisursuro, 6,406 a kuarto ken 11.9 milion a libro ken 2.4 milion a tugaw agsipud iti idadakkel ti enrolment dagiti pagadalan. Ad-adda pay a dimmagsen ti problema gapu iti immadu a bilang dagiti agbasbasa nga immalis iti publiko a pagadalan gapu iti nangina a matrikula ken tuision kadagiti pribado a pagadalan

Agpayso, ti edukasion ti kadakkelan iti mailatang a budget iti tinawen ngem nababa nga amang no maidilig iti mailatang a pundo para iti edukasion kadagiti kaarrubana a pagilian iti Asia ket agkurang ti pundo para kadagiti naagapad a pagkasapulan ti departamento.

Iti daytoy a tawen, agdagup laeng iti 13 porsiento ti aproprasion ti pagilian para iti edukasion ngem 20% ken nangatngato ti ilatlatang dagiti kaarrubana a pagilian para iti edukasion.

Rumbeng laeng nga ikkan ti turay iti dakdakkel a pundo ti DepEd a maikumpara iti ilatlatang dagiti kaarrubana a pagilian para iti edukasion dagiti umilida. No agpayso a dimmur-as ti ekonomia, dimmakkel ti koleksion manipud iti E-Vat, ken maited ti turay ti 40% iti sibubukel a budget para iti pagbayadna iti utangna kadagiti bangko ditoy ken iti ballasiw-taaw, apay ketdin a saanna a maingatngato ti ilatangna para iti edukasion?#

Comments are closed.