Footer

Narugit, malisioso nga interpretasion surat dagiti papadi ti Nueva Segovia: PPCRV/NAMFREL Cand

CANDON CITY – Linagidaw dagiti opisial ken boluntario ti Provincial Pastoral Council for Responsible Voting/National Movement for Free Elections ditoy ti “narugit ken malisioso” nga interpretasion iti statement dagiti papadi iti Nueva Segovia babaen dagiti sumagmamano a grupo para iti mapapati a  pannakaipromot ti bukodda nga interes.

Daytoy ti imparuar a reaksion dagiti nasao nga opisial ken boluntario ti PPCRV/Namfrel iti waragawag dagiti papadi ti Nueva Segovia a nangkondenaranda iti narugit a pannakaisayangkat ti eleksion iti probinsia.

Iti statement nga imparuar ti Nueva Segovia Priests Assembly, indeklara dagiti papadi ti panangkondenarda kadagiti mapapati a panaggatang  iti butos, panaglako ti butos, opponent-buying kadagiti awan kasangoda a kandidatura idinto nga inyunay-unayda ti pannakabilang manen dagiti butos tapno “masigurado  ti pudno ken hustisia kasta met iti panagtalek iti proseso ti eleksion”.

Ngem kas reaksionda, nangiparuar met ti PPCRV/Namfrel Candon iti waragawag a nangsalaknibanda iti integridad ti naangay nga eleksion iti daytoy a siudad.

“We, the officers and volunteers of PPCRV/Namfrel Candon deplore the dirty, malicious and self-serving interpretations of the statement of the Nueva Segovia Clergy,”  nakuna ti surat.

“Mamatikami ken iwaragawagmi ti pudpudno, agpaypayso ken maiyannurot a pannakakanbas dagiti butos iti 2007 elections ditoy siudad ti Candon,” kinuna ti sabali a paset ti waragawag ti PPCRV/Namfrel Candon a pinirmaan da Rev. Fr. Melchor Reonal,  chairman, Samuel Garcia, vice chairman, Cherry-Lou Robledo, sekretaria, ken ni Rev. Fr. Vicente Avila.

Nailanad iti surat ti palawag ni Candon City election officer Fidel Gines mainaig iti mapapati a pannakataktak ti canvassing ti election returns ken kaadda dagiti erasures iti gubernatorial posts nga awanan iti countersign a maysa kadagiti kapaliiwan a dinakamat dagiti papadi ti Nueva Segovia.

Iti palawagna, pinaglibakan ni Gines nga adda pannakataktak iti pannakakanbas dagiti election returns.

“Segun iti minutes ti Comelec, nag-convened ti City Board of Canvassions iti alas 6 p.m. iti Mayo 14 kas intuding ti Omnibus Election Code”, paset ti palawag ni Gines idinto nga innayonna nga iti “eksakto 10 p.m., babaen ti sangsangkamaysa a butos dagiti miembro, ken yaannugot dagiti watchers a presente ken ni Atty. Abrero, counsel para ti Lakas-NUCD, indeklara ti board ti recess ken ti panag-reconveneda iti tiempo nga adda indatag ti reception and custody group nga umuna nga urna a naglaon kadagiti election returns”.   

Nag-reconvene ti board iti 6 a.m. iti Mayo 15, 2007, segun iti palawag ni Gines.

Inannugot ni Comelec officer nga “adda dagiti naaramid nga erasures iti nagan dagiti gubernatorial ken vice gubernatorial posts nga awanan iti countersign manipud kadagiti maseknan a tattao” ngem “awan dagiti erasures kadagiti resulta ti butos dagiti kandidato”.

Kinuna dagiti opisial ken boluntario ti PPCRV/Namfrel a daytoy a waragawag ti Nueva Segovia ket ar-aramaten ken ab-abusaren ti sumagmamano a grupo tapno maipromot ti bukodda nga interes.

Comments are closed.