Footer

Pannakaabakna kinasenador, inaklon ni Chavit

VIGAN CITY – Inaklon ni Gov. Luis “Chavit” Singson ti pannakaabakna a para senador.

“…naabaktayo, saantayo nga agpampambar,” kinuna ni Singson  idinto a pinagyamananna dagiti kailianna ta isu ti nagnumero uno iti Ilocos Sur.

Kabayatan ti kampania, iti maysa nga interbiona iti lokal imbatad ni Singson nga awan ti pannakaabakna ta suportaran amin dagiti gobernador ken mamayor ken isu laeng ti puro nga Ilokano a nagkandidato.

Sakbayna, inwaragawag pay ti Union of Local Administrators of the Philippines (ULAP) ken gunglo dagiti munisipalidad ken probinsia iti pagilian ti panangsuportada ken ni Singson a para senador.

Impannakkel pay ni Gov. Evardone nga iti panangiyendorsoda ken ni Singson, kayatda nga ipamatmat a kabaelanda ti mangitag-ay iti kandidatura ti padada a lokal nga ehekutibo.

Ngem kadagiti surbey ti Pulse Asia ken Social Weather Stations, adda laeng ni Singson iti maika-24-25 a puesto.

Kas maibatay iti kaudian a resulta ti panagbilangan ti Commission on Elections, nagtalinaed ni Singson iti maika-24 a puesto.

Ngem kinuna ni Singson a nabaybay-an dagiti kandidato ti administrasion para senador agsipud iti panagbabalubal dagiti gobernador, congressmen ken mayor nga agpapada nga adda iti sidong ti administration party.

“Daydiay ti madi ta nagsango (kandidato) ti agsumbangir nga administration party,” kinuna ni Singson ket “daytoy ti gapuna a naituon ti konsentrasionda iti laban a lokal ket saanda nga inkampania dagiti kandidato para senador.”

Kinuna ti gobernador a nadlawna daytoy nga internal a problema ngem “saanda unay nga inkonsidera iti ngato” agsipud ta impatalged ti agsumbangir a partido ti administrasion nga agtrabahodanto para kadagiti kandidato ti Team Unity.

“…daydiay ti husto a naaramid, awan ti nagtrabaho (gobernador, congressman, mayor) gapu iti riri a lokal,” nakuna ni Singson.

Kinuna ni Singson a nagretiro koman iti politika no nalpas ti kaso ni dati a Presidente Joseph Estrada.

“Nagretiroak idin, nagsubliak laeng ta di malmalpas ti kaso,” inyunay-unayna.

Kinunana nga awan ti duadua a makonbiktar ti dati a gayyemna “ta nagadu nga ebidensia.”

Kinuna ni Singson a “maysa a rason a nagtarayak a senador dagidiay reporma koma a maaramidtayo a pagsayaatan ti dagatayo a Pilipinas nangruna ti justice system,” ngem “awan met ti gasattayo isu a makaammonton dagiti future leaders… I hope a dagiti babbaro a leaderstayo, daydiay koma ti ipangrunada tapno (kasta) agtalna ti dagatayo a Pilipinas.”#