Footer

Suspetsa iti pammaltog, negatibo iti pulbora

CABUGAO, Ilocos Sur – Umun-uneg ti misterio iti pammaltog a napasamak iti maysa a sitio ditoy kalpasan a negatibo iti pulbora ti ima dagiti dua a suspetsa.

Ngem kada barangay kapitan Edgardo Sonido ken barangay konsilman Nestor Tabula, pinatalgedan ti resulta ti paraffin test a naiwayat kadakuada nga awan ti nakainaiganda iti pammaltog iti sitio Turod Patac a nakatayan ti maysa ken nakasugatan ti tallo a tattao.

“Dakkel unay ti pannakalag-an ti pampanunotmi ta numan pay no kasta unay ti pammabpabasolda kadakami ayanmi met ti agan-annad ta… nagrigat gayam ti maisawsaw kadagitoy kastoy a paspasamak…” kinuna ni Sonido.

“Nasayaat met ti resulta ti paraffin test barbareng no malawlawagan ti pampanunot dagiti kabarangayanmi a nangitudo a dakami ken ni apo Kapitan ti nangaramid iti dayta a pammaltog,” nakuna met ni Tabula.

Kinuna ni Sonido a nagdisnudo a napan nagpaparaffin test iti Kampo Bulag (Camp Elpidio Quirino) “ta kayatmi a madalusan ti naganmi…” innayon ti barangay captain.

Natay ni Allan Tabarejo, 27, karpintero, bayat ti pannakataming ti sugatna iti ospital idinto a nasugatan da Marlon Tabula, 25, mannalon; Juan Taberna, 45, mannalon, ken ni Josephine Tumacder, 24, agpapada a residente iti sitio Turod Patac ditoy gapu iti pannakapaltogda bayat ti maysa a pasken iti balay ni Fernando Duran.

Mapapati nga intudo ti biktima sakbay a nagsatan iti anges ni Sonido a nangisayangkat iti pammaltog.

Alegasion pay a mismo a ni Sonido ti nangibalikas iti “Mataykan, Johnny,” sakbay ti pammaltog.

Imbatad met ni Mayor DioCaesar Suero nga adda pakainaigan iti politika ti pammaltog.

Ni Amelia Sunio Abarquez, ti kinasango ni Suero para mayor ditoy nga ili, ti sinuportaran ni Sonido.

Iti pannakaiuman kenkuana ti DWRS, kinuna ni Sonido nga idi mapasamak ti pammaltog, adda iti uneg ti pagtaenganna iti Madula, maysa a sitio a “sumurok-kumurang maysa kilometro ket kagudua ti kaadayona” iti Turod Patac proper a nakapasamakan ti krimen.

Kinuna ti barangay official a sumagmamano a kalugaranna ti mangpaneknek iti kaaddana iti pagtaenganna idi napasamak ti pammaltog.

Kinuna met ni Tabula a kagapgapuna a napan nangala iti sabon iti balay ti maysa nga ulitegna ket agsublin iti balayda idi makangeg iti putok.

Kinunana a tinarayna dagiti aginana sada nagpakni iti ulitegna.

Kinunana nga iti daydi met la a rabii, sinukon dagiti polis a mapan agpalawag iti municipal police station ket dita a naammuanna a maysa kadagiti suspetsa.

Kinuna ni Sonido a nupay nagsupadi ti partidoda ken Taberna, awan ti nagsinnungbatan wenno naginnuraanda.

“Ammok met ti bagik nga awan ti aramidko isu a nadalus ti konsensiak a simmurot kadakuada (polis) a napan iti Bulag,” nakuna pay ni Sonido.

“Adayo a banag a maaramidmi dayta,” kinuna ni Tabula sana innayon a “mismo pay a kaanakak ti maysa a nairaman…” #