Footer

Ti Bilin, ti Kari ken ti Agatha Christie (Maudi a paset)

Diak ammo. Diak a maawatan. Indissok ti libro. Inyiladko pay. Alas 7:30 ti agsapa. Hustonto no alas 11:00 a panagluluto, kinunak.

Simmeksek lattan iti utekko ti bilin ken ti karik a diak agbasa iti libro ni Agatha Christie.

Nagkariak a tungpalek dayta a bilin. Nagtalinaed dayta a kari iti nasurok a tallopulo a tawen. Natungpal dayta a kari.

Kasla addaak iti nagbaetan ti dua nga agtuptupa a bato: adda dayta gagar, nalabes la unay a gagar, a basaek ti libro tapno manayonan pay ti ammok maipapan iti panagsurat iti misterio, ngem di mabalin ta adda dayta a bilin ken kari.

The world’s best known mystery writer. .. most widely published author of all time in any language, outsold only by the Bible and Shakespeare, palabsek pay laeng? kumurkurikor iti utekko. Basaem…! nagtangken ket a durogen ti kannigid a pispisko!

Immabot iti nasurok a tallopulo a tawen ti bilin ken ti kari. Nasken kadi a marakrakda? Kasano la unayen ti kinapateg kenka dagiti mystery a sarita? imbales met ti kanawan a pispisko.

Urayak la nakalua nga immigop iti kape ta nalipatak pay ketdin a nagburek gayam itay ti danum a nagtemplaak. Pinugpug-awak ti kape. Uray idi naibuskon, saanak pay laeng a nakaikeddeng no basaek wenno saan ti libro. Ngumayemngemak ta nagsimple a banag: basaen wenno saan.

Ngem adda dagiti babassit a banag iti sirok ti init a makapuling. Adda dagiti kakasla puling a banag iti rabaw ti daga a dakdakkel pay ngem ti katedral ti kaipapananna. Wen, adayo a napatpateg ti kasla kikit a balitok ngem ti kasla kadakkel ti nuang a bato.

Indigosko tapno makapanunotak iti aramidek. Nagsukatak. Innak pay idiay downtown agpagnapagna ken agtaya iti lotto.

Nabayagak iti uneg ti cathedral, a diak met nagkararag no di nagtugaw laeng. Sumsumrek ti libro iti utekko kabayatan ti panagpaliiwko kadagiti napasnek nga agkarkararag. Diak ammo no kasano ti kabayagko iti uneg ti simbaan.

Indulinko iti karton dagiti liblibro ti libro ni Agatha Christie idi simmangpetak.

Iti maysa a malem, nadatngak dagiti tallo nga annakko nga agbuybuya iti horror. Paboritoda a buyaen ti horror. Kritiko ngamin dagitoy nga ubbing ket katawaanda dagiti artista wenno babalawenda ti author no adda makitada a di umno iti buybuyaenda. Ultimonto pay a sinuratko ket dillawendanto no adda  mabasada a di umno.

“Napintas daydiay kabarbaro a librom, ‘pang?” dinamag ni Jaime III. Grade Six ngem managbasa met.

“Ania a baro?”

“The Secret of Chimneys!”

Nagmalangaak. Diak ammo ti isungbatko ta diak pay met nabasa. No diakto pay makaikeddeng no basaek wenno saan. Siguro, nagkalkal ti barok iti basaenna. Inyabayko ti karton dagiti librok kadagiti librona iti ghost stories.

“Daydiay Agatha Christie?” kuna ni manangda.

“Wen…”

“Tangek! Agbalinka a duggong no basaem daydiay!” nagellek ken naginnapir pay dagiti dua a babbai. Nagmalangakami ken ni Jaime III.

“Ta apay nay?” kinudkod ti buridek ti tuktokna.

“Maipapan iti murder ken blackmail daydiay!” ket naginnapir manen dagiti dua a babbai sada pay nagellek.

“Ket ania koma!” natangken latta met ti buridek.

“Kayatmo ngarud ti agbalin a murderer ken blackmailer, duggong?” kuna ti inaunaan. Ekspresionda ket daytoy a balikas.

“Tawid News Magasin editor’s son, sentenced to 120 years for murder and blackmail…!” inyillek ti inaudi a babai.

Urayak la nagkintayeg a nakangngeg iti imbagana. Kasla nagwengweng dagiti lapayagko ket nakariknaak iti panaglulok dagiti tumengko. Nakaangotak iti peggad.

“Madik man ngay!” imbales ni Jaime III tapno agtalna ti panagellek dagiti dua a manangna.

“Agbasaka latta kadagiti libro ngem saanmo a basbasaen daydiay nga Agatha Christie…” naalumamay ti panangibagak iti buridekko.

Ket nagkari a dinanto basaen.

Napaangesak iti nauneg. Nalagipko ti bilin daydi amak. Nalagipko ti karik kadaydi amak.

Ti bilin. Ti kari. Maiyallatiw met gayam iti sumaruno a henerasion.

Matungpal ngata daytoy a bilinko kenkuana?

Matungpalna ngata daytoy a karina?

Umabut met ngata iti nasurok a tallopulo a tawen wenno nabaybayag pay dayta a bilin?

Umabut met ngata iti nasurok a tallopulo a tawen wenno nabaybayag pay dayta a kari?

A kas iti naibilin kaniak. A kas iti inkarik?

Ti laengen panawen ti makaibaga. Tarabayennakam koma ti Namarsua, ita nga aldaw ken iti agnanayon.#

Comments are closed.