Footer

Ti naiyanak iti lenned

diak kiniddaw a mainawak

ngem nainawak, naipasngayak

naipasngay a lenned, iti lenned

diak kiniddaw a mainawak
ngem nainawak, naipasngayak
naipasngay a lenned, iti lenned
saksi ti Lawag ti pannakasiray
ti kuridemdem a panawen
dimmakkelak, ngem sumursurot latta
ti anniniwan ti  nagtaudak
pilitek man a lissian, lissiak
ngem napaayak, napaay
natupraan latta ti likudak
naiparupa dagiti tignay-ublag
nasaem ti duyok ti kinapudno
diak maballikog ti nangbungon
ti kinataok, ngem mapabasoldak
mababalawdak kadi no kunak
a diak kiniddaw a mainawak
ngem nainawak, naipasngayak
ken diak met kiniddaw a laisendak
ti gimong, ti managinkukuna
a lubong dagiti nasabrak…
nupay kasta, umaddangak
wen, umaddangak latta
ta sursurotek ti Lawag
a saksi, ti kakaisuna a saksi
idi naipasngayak…