Footer

Agmulmula iti repolio, nagpukaw gapu iti nababa a presio

BENGUET – Sobra a produksion ti nangiduron iti panagsuek ti presio ti repolio ditoy.

Daytoy ti imbatad dagiti opisial ti agrikultura ditoy idinto nga indagadagda ti pannakaimplementar ti crop programming tapno saan nga agsobsobra ti produksion a pakaigapuan ti panagpababa ti presio dagiti mulada a nateng.
Nagpangato ti presio ti repolio ditoy iti P5-6/kilo iti panaglukat dagiti klase ngem nagpababa met laeng iti P3-4 kilo iti simmaruno a lawas.
Kinuna ti maysa a mannalon a dakkel ti pukawda gapu iti nababa a presio ti repolio, kasungani idi ngapan a tawen a dakkel ti ganansiada gapu ta napintas ti presioda.
Innayonna a tapno makaabrotda iti nabusbosda iti ganagan ken pannakaibiaheda, kasapulan a manipud iti P8 agingga iti P10/kilo ti presio ti repolio.
Iti sabali a bangir, nakaganansia dagiti nagmula iti carrots ken patatas ita a tawen agsipud ta nasayaat ti presioda.
Mailaklako ti carrots iti P30/kilo idinto a P15-18 iti patatas, presio a mapattapatta a gumanansia dagiti mannalon.
Itay napan a tawen, nagpukaw dagiti nagmula iti carrots gapu iti kinababa ti presioda.
Ngem kinuna ti maysa a negosiante a dagiti mannalon ti yan ti basol no apay a nababa ti presio ti repolio gapu iti sobra a produksionda.
Kinunana nga ad-adu ita ti immula dagiti mannalon a repolio a nairanta a maapit iti panaglulukat dagiti klase.
Inggunamgunamna ti panagmula dagiti mannalon kadagiti nadumaduma a nateng a maapit iti maiparbeng a tiempo, saan a kas iti mapaspasamak nga awan ti masursurot a programa iti panagmula iti nateng.
“Kasapulan ti political will dagiti lokal nga opisial a mangimplimentar iti crop programming ken iti pannakitinnulong dagiti mannalon,” inyunay-unayna.