Footer

Candon City government, ilibrena ti panagbasa sumrek iti first year high school

CANDON CITY – Mangrugi iti daytoy nga school year, libre ti panagbasa amin dagiti ubbing a tagaditoy a sumrek iti first year high school.

Kinuna ni nailayon a konsehal ditoy siudad Rosario Villalobos a tapno maguyugoy dagiti ubbing a makaadal, nangruna dagiti kagradgraduarda iti elementaria itay napalabas nga school year, pagbalinen ida ti city government nga scholar iti iseserrekda iti first year high school iti siudad.
“Malaksid iti sumurok-kumurang 150 nga scholarstayo iti kolehiyo, adda daytoy programa ti city government a mamagbalin nga eskolar amin nga ag-first year high school iti siudad ti Candon,” kinuna ni Villalobos, committee chairman iti Edukasion iti sangguniang panglunsod ditoy bayat ti interbio kenkuana ti DZTP Radio Tirad Pass itay nabiit.
Inlawlawagna nga agsipud ta libre ti tuition fee kadagiti public high school, ti laengen miscellaneous fee ti bayadan ti city government.
“Prioridad a programa ti administrasion ni Mayor Allen Singson daytoy tapno amin nga ubbing ket makapagbasa iti high school… tapno matulongan dagiti marigrigat a mangpabasa dagiti ubbingda,” kinuna ni Villalobos.
Innayon  ni  Villalobos a nakisaritan kadagiti amin a pagadalan iti high school iti Candon tapno maakomodar amin nga agpaenrol iti umuna a tukad ti sekundaria ta ti siudadton ti mangbayad iti rumbeng a bayadanda.
Inlawlawag ti konsehala a tunggal estudiante ket nailatangan iti P500, gapuna nga uray kadagiti pribado a pagadalan ket mabalinda latta ti ag-enrol, basta ditoy la ketdi siudad ti pagbasaanda ken agnaedda iti Candon.
Inyunay-unay ni Villalobos a dagiti laeng simrek iti first year ti mabenepisiaran iti daytoy a programa ti city government ket saan a karaman dagiti addan iti nangatngato a tukad iti sekundaria.