Footer

Fil-am a soldado a nagudas iti Iraq, namedaliaan iti pannakaitabonna

CANDON CITY – Natungpal ti tarigagay ti maysa a Filipino-American a ditoy  nakayanakanna a lugar ti paginanaanna apaman nga agretiro iti US Army.

Itay Hunio 20, naitabon ni US Army Staff Sgt. Greg Phil Gagarin, 38, iti sementerio publiko ditoy siudad kalpasan ti sumagmamano nga aldaw a pannakaimassayag ti bangkayna iti pagtaenganda iti sitio Quimmarayan, barangay Caterman, ditoy tapno ditoyen nga agnanayon nga aginana.
Segun ken ni Ernesto Gagarin, ama ni Greg a retired master sergeant ti US Army,  dua tawen pay sa agretiro koma ti anakna ket nadakamat daytoy nga iti lugarda ti kayatna a paggianan.
Nayanak ditoy ni Gagarin, ngem napan iti US idi agtawen iti 10.
Itay Hunio 3, maysa ni Gagarin kadagiti natay idi bimtak ti maysa nga improvised a bomba iti asideg ti luganda bayat ti panagpatroliada iti Thania, Iraq.
Nagudas met da Sgt. James Akin, 23, iti Albuquerque, N. M., Sgt. Tyler J. Kritz, 21, iti Eagle River, Wis., ken ni Sgt.Robert A. Surber, 24, iti Inverness, Fla.
Agpapadada a naka-assign iti 1st Battalion, 37th Field Artillery Regiment, 3rd Brigade, 2nd Infantry Division, (Stryker Brigade Combat Team) iti Ford Lewis, Washington State.
Bayat ti simple a seremonia ti pannakaitabonna, inyawat ni Brig. Gen. Simeon Trombitas, commander ti US Army special operations command iti Korea, ti posthumous award, ti Bronze Star for Valor and the Purple Heart, ken ni Elma ken ti amana.
Idi naiyawid ti bangkay ni Gagarin iti sitio Quimmarayan, barangay Caterman, ditoy, kinuyog mismo ni Albert MacFarland, agdama a director ti mortuary affairs, US Army Mortuary a nakabase idiay Korea ken dagiti uppat a kakabsatna ken dadduma pay a kakabagianda.
Kinuna ni Trombitas a tangtangaden dagiti kakaduana  ni Gagarin kas liderda ken mangdisiplina kadagiti tropana a nakabase iti Iraq.
“Mamati kenkuana dagiti soldadona ken dakkel ti panangipategmi kenkuana,” kinuna ti commander.
Ni Gagarin ti maikapat a soldado nga adda darana a Filipino a natay iti Iraq manipud itay napan a bulan.
Nairaman kadagiti tallo a nagudas ni Pfc. Victor Michael Fontanilla idi Mayo 17 idi bimtak ti maysa a bomba iti igid ti kalsada nga asideg iti luganda iti Iskandariya, Iraq.
Natay ni Mark Ryan Climaco Caguioa iti ospital idiay Maryland idi Mayo 24 gapu kadagiti sugat a linak-amna iti panagbettak ti bomba iti Baghdad.
Itay Mayo 29, natay met ni US Army Sgt. Richard Valiant Correa ken sabali pay a kaduana idi bimtak ti maysa a bomba iti asidegna bayat ti panagpatroliada iti Ilbu Falris, Iraq.
Inulila ni Gagarin ti asawana, ni Elma Cacho, ken ti dua nga annakda, da Troy, 8 ken ni Natasha, 4. (Karaman ti report ni Danny Antalan)