Footer

Ikararagan, respetaren ni Katoliko ti minatayna

NANGLANGEB TI tanga-tang kadaydi a malem. Nalam-ek ti puyupoy ti tartaraudin nga aldaw ti Oktubre. Iti amianan simmungad ni Mang Pinong nga agibar-ibar ti pannagnana. Ita man pay a nabartek daytoy a lakay a retirado a mistro? Idi makaasideg, natakuatak a saan a laeng gayam a nabartek,  agsangsangit pay.

Nagdaydayawak ken nagim-tuod. Natay kanon ti kakaisuna a kabsatna. Ti nasakit, intabon nga insegida dagiti uppat nga annakna a dida man la impakaammo kadakuada. Saanda man laeng a linamayan.
Kabigatanna, nadamagko laengen a napan tinubtob ni Mang Pinong ti panteon ti kabsatna ket lamlamayanna ti bangkay daytoy iti puneraria. Nakilamay met dagiti annakna ken dagiti gagayyemda ken makaam-ammo kadakuada. Napanak met nangited iti respeto iti daydi nagawan. Nangitanamitimak iti ababa a kararag a sapay koma ta makapudno ken mapakawan kadagiti nagbiddutanna. Nakiinnandingayak metten  kadagiti agsagsagaba iti liday. Ta nakairuaman ni Katoliko ti panangandingayna iti padana a tao iti man ragsak ken liday.
“Indarumdak, adik, ngem idarumko met ida,” insaibbek ni Mang Pinong. “Awan pusoda nga inanak!”
Adda dagiti sekta-pammati a mangiyik-ikkis nga isuda ket pudpudno a Christians. Ngem saanda a mamati a no natayen ti maysa a tao, adda pay serbina.  A saanen a nasken nga ikararagan pay ti bangkay. Isuda a mangiyik-ikkis ken mangipadpaduyakyak iti pammatida babaen ti dida panangipakita kadagiti tattao iti panagdaydayaw ken panangited iti respeto kadagiti minatayda. Karaman dagitoy dagiti annak daydi nagawan a kabsat ni Mang Pinong.
Ngem saan a kastoy ti Katoliko.
Dagiti Katoliko ket ikararaganda dagiti minatayda. Itedda ti respeto iti natay.  Adda dayta a nangibasaran ti Katolisismo iti Biblia, rinibun a tawen ti napalabas. Nakadulin dagitoy a Biblia idi un-unana iti Greek Septuagint of St. Jerome, ti makunkuna a kadaanan amin a Biblia iti Jerusalem. Uray ni Apo Jesucristo ket inaramatna dagitoy a libro iti Daan a Tulag.
Nakalawlawag a masarakan iti libro ti Maccabees a nasurat iti ginasut a tawen sakbay ni Jesucristo ti panangikararag kadagiti minatay. (2 Mc 12:42-46).
No ikararagam dagiti makabael nga agpakawan kadagiti basbasolda, apay ketdin a dimo ikararagan dagiti saanen a makabael a makapagkararag tapno mapakawan met dagiti basolda?
No adda healing session kadagiti masakit, apay ketdin nga awan ti healing session kadagiti natay? Agsipud kadi ta saanen a makategged pay ti natay ket saan metten a makaited iti apagkasangapulo iti sapulna isu nga awanen ti serbina nga ikararagan pay?
Uray ni Jesucristo a mismo ket kinararaganna dagiti natay.
No awan ti serbina a maikararagan dagiti natay, apay ngarud nga inkararagan ni Jesucristo ni Lazaro uppat nga aldawen kalpasan a pimmusay?
Iti panangpagungar ni Jesus ken ni Lazaro, kinunana: “Ama, agyamanak ta ipangagnak. Ammok nga ipa-ngagnak a kanayon, ngem kunak daytoy gapu kadagiti tattao nga adda ditoy, tapno patienda nga imbaonnak.” (Jn 11:41- 42)
Inkararagan ni Apo Jesus ni Lazaro tapno agbiag iti biag nga agnanayon. Apay ketdin a saantayo met nga ikararagan dagiti minataytayo tapno maragpatda met ti pammakawan ket iti kasta mairanudda met iti biag nga agnanayon?
Ni Katoliko, aramidna ti mangikararag ken mangited iti respeto kadagiti minatay. Saan laeng iti panawen ti massayag, no di adda pay naituding a pamisa: pasiam, maika-40 nga aldaw kalpasan ti ipapatay, ken ti agmakatawen, nga isun ti pananguksob iti panes, pannakailagip ken panangikararag kada dumteng iti Piesta dagiti Natay; kadagiti dadduma, karaman a maikararagan iti Nasantuan a Misa.
Daytoy ti awan kadagiti saan a Katoliko. Saanda nga ikararagan ken respetuen dagiti minatayda.
Kasano koma ngarud ti inka panagdaydayaw iti Mannakabalin no dimo met ammo ti mangipaay iti respeto iti minatay a dinan maipalagip kenka ti kinaimbag nga ited ti panagdayaw?
Ni Katoliko, saanna laeng nga ited ti respeto kadagiti minatayna no di pay  ikararagan ken idawatanna iti pammakawan kadagiti nagbasolanda. Ikararaganna ta sapay koma ta makipagbiagda iti agnanayon. Daytoy ti awan kadagiti dadduma a sekta-pammati…#

Comments are closed.