Footer

Maad-adal no makaapekto peace talks pannakatiliw gapu iti droga ti lider ti CPLA

BAGUIO CITY – Ad-adalen ti Cordillera Bodong Administration (CBAd) no makaapekto iti patangan ti kappia iti nagbaetan ti Cordillera People’s Liberation Army (cpla) ken iti gobierno ti pannakaaresto gapu iti droga da Bucloc, Abra Mayor Mailed Molina ken dua a kakaduana.

Kinuna ni Marcelina Bahatan, presidente ti CBAd,  a saan a sigurado ti CPLA no masaklaw ti grupo iti imunidad a mait-ited iti panel dagiti rebelde a grupo a makinegnegosiar iti kappia, kas iti New People’s Army ken iti Moro National Liberation Front.
Ni Molina ti agdama a dadaulo ken commanding general ti CPLA  ngem nagipila iti leave of absence idi nagkandidato a para congressman maikontra kada dati nga Abra Gov. Vicente Valera ken dati a Lagayan Mayor Cecilia Luna.
Naabak ni Molina.
Kinuna ni Arsenio Humiding, acting CPLA chairman,  a mangiwayat ti CPLA iti emerhensia a session tapno pagpapatanganda no makaapekto ti pannakaaresto ni Molina iti patangan ti kappia.
Kabayatanna, kinuna maysa nga opisial ti Quezon City Police District (QCPD) a dida inrakurak ti pannakaaresto ni Molina tapno saan a maperhuisio dagiti follow-up operations nga insayangkatda mainaig iti nagtaudan iti droga a nakumpiska iti ikut ti mayor.
Segun iti hepe ti QCPD public information office,  Supt. Asprinio Cabula, nagturong iti Abra dagiti operatiba ti QCPD Anti-Illegal Drugs Special Operation Task Group ken ti Criminal Investigation and Detection Unit (CIDU)  para iti follow-up operations iti nagtaudan dagiti droga ngem nagsublida nga ima-ima.
Inaresto dagiti operatiba itay Hunio 13 da Molina ken dua a kaduana, da Ricardo Verzosa, drayberna, ken Ritchie Watanabe, negosiante, iti mapapati nga akto a panangiyawatna iti dua a bag a naglaon iti dua a kilo a marijuana bricks ken 800 grams a napulbos a bulong ti marihuana iti maysa nga undercover police officer.
Nakumpiska pay dagiti operatiba iti maysa nga automatic rifle ken cal. 45 pistol a mapapati nga awan lisensiada ken nadumaduma a bala.
Kinuna ni Cabula a naipaiman ti inquest piskal iti Department of Justice dagiti kaso a panagsalungasing iti Republic Act No. 9165 wenno Comprehensive Dangerous Drugs Act of 2002 ken illegal a panagikut iti armas ken bala maikontra kada Molina ken dagiti kakaduana.#