Footer

Ni pay la JDV ti agbalin nga speaker, Cong. Eric

CANDON CITY – No ni Deputy Speaker for Luzon Eric Singson ti pagdamagan, dakkel  pay laeng ti namnama ni Speaker Jose De Venecia a mapagtalinaedna ti kinaespikerna iti House of Representatives iti masungad a panaglukat ti 14th Congress.

Kinuna ni Singson bayat ti panakiuman-uman kenkuana dagiti kameng ti media ditoy a no maibasar iti bilang dagiti nakaruar a congressmen iti sapasap a pagilian, dakkel pay laeng ti gundaway ni JDV a magun-odna ti kinaespiker iti Kamara.
Kinuna ti mangibagi iti segundo distrito nga aganay a 89 dagiti kongresista a kameng ti Lakas Party, adda met 25-30 a nakaruar a kameng ti NPC a naikappeng iti coalition ni Speaker de Venecia, sa mainayon ti lima a nakaruar a kameng ti LDP-Angara wing ken dagiti sectoral representatives a sigud a kaduana, adda kadagupan a nasurok a sangagasut ket uppat a pulo dagiti mangsuporta iti panagpanggepna manen a manggun-od iti kinaespiker.
Kinuna pay ni Singson nga nga adda pay dagiti kameng ti Kampi babaen ken ni Cong. Ronaldo Puno a nangibatad iti panangsuportada ken ni Speaker de Venecia.
Partido ni Pres. Arroyo ti Kampi idinto a da de Venecia ken nag-Presidente Fidel Ramos dagiti dadaulo iti Lakas.
Itay nabiit, imbatad ni Cong. Pablo Garcia iti Cebu iti panangsangona ken ni de Venecia gapu iti panangidurosna iti charter change iti napalabas a Kongreso babaen ti constituent assembly uray pay saanen a karaman dagiti senador, a nangipeksaan dagiti oposision, kritiko ken sektor ti relihion ken civil society organizations iti protestada iti nasao a tignay.
Saanen nga intuloy da de Venecia ti tignay iti Kamara a mangbaliw iti konstitusion babaen iti constituent assembly iti sanguanan iti idudupir dagiti agprotesta.
Kabayatanna, kinuna ni Singson a tarigagayna  ti agtalinaed iti agdama a puestona kas deputy speaker no palugodan ti Kongreso.
 “Depende kadagiti  Lakas members, so far, ibagbagada met a maretenerko ti puestok. Kasta met ti ibagbaga ti Liberal Party,” kinuna ni Singson.

Comments are closed.