Footer

Tubbog ti suso kontra infant formula

Ditoy pagilian, nabileg dagiti multinational companies ta ti kayatda ti matungpal uray no makasugkar iti rikna ken pampanunot dagiti umili.

Pagarigan dagiti agas a mailaklako iti pagilian, ingget nginada ket kakaasi dagiti umili nangruna dagiti marigrigat a manggatang kadagiti kasapulanda a tomaren tapno adda pangsilpoda iti biagda.
Sumagmamano a gakat ti naidatag iti Kamara ken iti Senado tapno mapalaka ti presio dagiti agas ket mapalag-anan dagiti umili, nangruna dagiti addaan sakit. Ngem nagrikep ti maika-13 a Kongreso a di man la tinaldiapan dagiti agilinlinteg iti Kamara daytoy napateg a gakat.
Napatalgedan la ket ngarud ti suspetsa nga adda nagnaan ti panag-lobby dagiti ganggannaet a kompania ti agas tapno saan a lumsot iti Kamara daytoy a gakat a ninamnama la ketdin dagiti umili a  mangpalag-an iti bulsada.
Ita, sabali manen nga isyo ti nakatagamtaman dagiti dadakkel a ganggannaet a kompania: ti isyo a pinataud iti implementasion ti  Milk Code of the Philippines.
Sagudayen ti nasao a milk code a  matimbeng ti panagianunsio dagiti kompania ti gatas iti produktoda nga infant formula wenno dagiti nailata wenno naikarton a gatas a kas sandi a taraon dagiti maladaga ken ubbing nga agtawen agingga iti dua.
Supiaten daytoy dagiti kompania ti gatas nga irepresentar ti Pharmaceutical and Healthcare Association of the Philippines (PHAP). Karaman dagiti nangbukel iti PHAP dagiti dadakkel a kompania nga agparpartuat iti infant formula ti Wyeth, Mead Johnson Nutritionals ken Abbott Laboratories nga agpapada a nakabase iti US.
Iti biang ti Department of Health, kasapulan nga agpasuso ti ina agsipud ta ti gatas nga agtaud iti suso ti kasayaatan a taraon ti anakna a maladaga agingga iti agtawen daytoy iti dua.
Segun iti DoH,  bimmaba ti bilang dagiti inna nga agpasuso kabayatan ti umuna nga uppat agingga iti lima a bulan manipud iti 20 porsiento idi 1998 iti 16 porsiento iti 2003.
Itudo ti Salun-at a ti immadu a bilang dagiti inna nga agtrabaho ken iti panagalla-allada iti trabahoda ti maysa kadagiti gapu no apay a saanen nga agpasuso dagiti maseknan nga inna.
Dayta ti kayat nga aturen ti DoH agsipud iti natakuatan ti World Health Organization nga agdagup iti 16,000 a maladaga ti matmatay iti malnutrision agsipud ta saanda a napasuso iti umuna nga innem a bulan kalpasan ti pannakaiyanakda.
Kinuna pay ni David Clark, legal expert on milk code enforcement ti United National International Children’s Emergency Fund, a saan nga  isterilisado ti powdered infant formula ket mabalin nga adda linaonna a makadakes a bakteria a mangited iti sakit iti ubing.
Kinuna met ti maysa a dadaulo ti Arugaan Foundation and Save the Babies Coalition nga awan ti kinapudnona dagiti anunsio dagiti kompania ti gatas a ti infant formula ti sumaruno, maikadua iti panagpasuso, a kasayaatan a para iti maladaga  agsipud ta ikutda dagiti nutrision a kasapulanda.
Innayon met ti DoH a palso dagiti ibatbatad dagiti kompania ti gatas iti anunsioda kas dagiti anunsio a makapasirib dagiti infant formula, nadarasda a patayagen ti ubing,  ken dadduma pay a false claims nga awan met ti kinapudnona.
Ngem iti biang ti Pharmaceutical and Healthcare Association of the Philippines (PHAP), mangireprepresentar kadagiti multinational companies, saanda a kontra iti panagpasuso ti ina agsipud ta “mamatida a daytoy ti balitok a pagbatayan” no mainaig iti nutrition ti maladaga.
Kuna ti abogada ti PHAP a ti panangiparit iti panaganunsio iti infant formula a ti konkontraenda agsipud ta leplepan ti nasao a milk code dagiti katulagan iti international trade and marketing.
“Saan a rupak iti nagbaetan iti breast-feeding advocacy ken ti industria ti gatas.  Kontraenmi ti arogante nga aramid… ti panangaramat iti bileg a saan a naited kadakuada (DoH),” segun iti PHAP.
No patien ti PHAP, binaliwan ti DoH ti kalawa ti Milk Code wenno Executive Order No. 51 a nangituding a saklawenna laeng dagiti maladaga agingga iti makatawen ket pinagbalinna nga agpatingga iti 2 a tawen.
Inyunay-unayna pay a salungasingen ti nabalbaliwan a paglintegan ti milk code  ti panagsina ti ehekutibo ken lehislatibo a sanga ti gobierno.
Kinuna ti PHAP a ti laeng Kongreso ti makailawa wenno mangamendar iti saklawen ti milk code ket saan a mabalin ti DoH ti agputar iti linteg.
Kasta met a lapdan ti nabaliwan nga implementing rules and regulations (IRR) ti kalintegan ti publiko iti impormasion ken iti kalinteganna nga agpili iti panagpasuso wenno babaen iti infant formula.
Mainaig iti alegasion nga awan kinapudnona dagiti pagsayaatan ti maladaga a maiyan-anunsio a maited ti infant formula, kinuna  ti PHAP a “saan a maikanatad nga akusasion” dayta.
Inyunay-unay pay ti PHAP a gapu iti nabaliwan nga IRR, nagpukaw dagiti kompania ti gatas iti aganay a P10 bilion.
Ngem uray kasano a panangikalintegan ti PHAP, nalawag a lapdanda ti pannakaimplementar ti milk code agsipud ta makaapekto iti dakkel iti paspastrekenda kadagiti produktoda nga infant formulas.
Paglibakan man wenno saan dagiti multinational milk companies, dakkel a paglakuanda iti produktoda iti Pilipinas kas pakapaneknekan kadagiti agsasallupang nga anunsioda kadagiti radio, telebision ken pagiwarnak.
Ngem ti saanda nga imbatad: gapu kadagitoy makaay-ayo nga anunsioda, adu dagiti inna ti mamati a nasamayda a sandi iti gatas iti suso ket maawisda a mangiwalin iti panagpasusoda ket ti infant milk formula ti usarenda para kadagiti anakda.
Kas nakunamin, dayta ti kayat nga aturen ti Departamento ti Salun-at. Ngem iti daytoy a bakalna, sanguenna dagiti malahigante a kabusor a di agkitakit a mangaramat amin a pamuspusan tapno saan a mayimplementar ti milk code.
Inaramatdan dayta a bilegda iti pannakaikupin ti gakat a mangpalaka iti presio ti agas. Masigurado nga aramatenda met ti bilegda tapno saan nga agballigi ti DoH iti daytoy a gannuatna.
Adda ita iti dakulap dagiti nalaing ken maraem a justices iti Korte Suprema iti pagbanagan daytoy a gannuat. Sipsiputan dagiti umili ti agbalin a pangngeddengda.#

Comments are closed.