Footer

6,000 seedlings, katuday, naimula iti Aldaw ti Wayawaya

SAN EMILIO, Ilocos Sur – Lima ribu a seedlings ti mahogany, gmelina ken dadduma pay a kayo ken 1,000 a katuday ti naimula iti tree park ditoy ken iti Lidlidda, Ilocos Sur kas paset ti panangselebrar iti Aldaw ti Wayawaya itay Hunio 12.

Lima ribu a seedlings ti nainayon a naimula iti 20,000 a dadakkelen a kaykayo iti tree park, iti Burayok, ditoy nga ili babaen dagiti  municipal ken barangay officials, empleado ti gobierno ken Day Care workers ken agnaed kas paset ti panangrambakda iti Independence Day itay June 12.

Kinuna ni Mayor Lorenzo  Bragado bayat iti interview kenkuana nga innem a tawenen nga ar-aramidenda ti panagmula iti kaykayo tapno parangpayenda ti nasao a bantay.

“Sumurok-kumurang a 10 nga ektaria ti kalawa daytoy a kabakiran, adu ti mulami a mahogany, gmelina ken dadduma pay a kaskayo,”  kinunana bayat ti interbio kenkuana ti Tawid News Magasin idinto nga innayonna nga addan 25,000 a kaykayo a naimulada iti tree park, pakairamanan ti 5,000 a seedlings a kaudian nga immulada itay Hunio 12.

“Adun ti umay agpikpiknik ditoy, nangruna iti aldaw iti Domingo, isu nga agtultuloy ti panagmulami  tapno agbalin a nangayed ti tree park ken mangsalbar payen iti ubbog ti danum ditoy ilimi,” kinuna ni Bragado.

Kabayatanna, 1,000 a katuday ti naimula iti Paraesus Berde iti Lidlidda, Ilocos Sur kas paset ti panangrambak dagiti municipal ken barangay officials, empleado ken residente.

Nalataken ti Paraesus Berde gapu kadagiti rinibu a naimula a nadumaduma a kaykayo kas iti mahogany, gmelina, ken dadduma pay a forest trees, fruit trees pakairamanan ti pinya ken dadduma pay ket nangabak payen iti national award manipud iti Malakanyang.

Kinuna ni Mayor ti Lidlidda Jesus Sagay nga itultuloyna daytoy a proyektona.

Comments are closed.