Footer

Gawad Komisyon 2007, naluktan

LINUKTAN ti Komisyon sa Wikang Filipino (KWF) itay lawasna ti Gawad Komisyon 2007, maysa a salip iti panagsurat kas paset ti panangrambak ti KWF iti Buwan ng Wikang Pambansa (Agosto 1-31, 2007).

Mairaman iti salip ti panagsurat iti sarita ken daniw iti Iluko.

Dagiti pagalagadan:

1. Silulukat ti salip kadagiti amin a mannurat malaksid kadagiti empleado ti KWF ken kameng ti pamiliada.

2. Nasken nga orihinal, di naipatarus manipud iti sabali a lengguahe, di pay nangabak iti major prize iti sabali a pasalip, ken di pay naipablaak.

3. Awan ti ilanad a nagan ti autor (pudno wenno parbo man) iti pakisalip. Adda sabali a pormulario (form) a maala iti KWF wenno iti http://wika.pbwiki.com a pangilanadan iti nagan, adres, ken dadduma pay nga impormasion maipanggep iti autor. Nasken met a manotarioan ti pormulario.

4. Siwawayawaya ti autor nga agpili iti topiko ti suratenna a sarita ken daniw.

5. Para iti daniw, maysa a koleksion a buklen ti 7 agingga iti 10 a daniw ti isalip. Para iti sarita, agatiddog iti 10 agingga iti 20 ti isalip. Nasken a makiniliado wenno kompiuterisado (12 pts., Arial), doble espasio, iti 8-1/2 x 11 a bond paper nga addaan iti mardyin a maysa a pulgada iti ngato, baba, ken iti agpada nga igid daytoy.

6. Uppat (4) a hard copy (nai-print a kopia) ken maysa nga electronic file (nakadisket a kopia) ti isalip a sarita ti daniw ken/wenno sarita ti idatag. Iraman met ditoy ti nasungbatan ken nanotarioan a pormulario.

7. Maysa laeng a sarita ken/wenno koleksion ti daniw ti mabalin nga isalip ti kada autor.

8. Dagiti premio iti sarita man wenno iti daniw: Umuna a Gunggona, P15,000.00 ken plake; Maikadua a Gunggona, P10,000 ken plake; Maikatlo a Gunggona, P8,000.00 ken plake; ken tallo a Consolation Prizes a sag-P2,000 ken sertipiko.

9. Amin a makisalip, maipaayan iti Pammaneknek iti Pannakisalip (Katunayan ng Paglahok) iti mismo nga aldaw a panangidatagna iti pakisalipna iti opisina ti KWF.

10. Pinal ken di mabalusingsing ti pangngeddeng dagiti kameng ti hurado. Amin a mangabak nga entry, agbalin a kukua ti KWF ken addaan ti KWF iti karbengan a mangipablaak itoy nga awan ti royalty nga awaten ti autor.

11. Maipatulod man wenno personal a maidatag ti pakisalip, nasken a maawat ti KWF daytoy sakbay ti 5:00 P.M. ti Hulio 27, 2007. No ipatulod babaen ti email, iraman kas attachment (iti format nga MS Word document) ti pakisalip ken ti sinungbatan ken pinirmaan a pormulario ti KWF.

12. Ipatulod ti pakisalip iti: Gawad Komisyon 2007, c/o Komisyon sa Wikang Filipino, G/F Watson Bldg., 1610 JP Laurel St., Malacañang Palace Complex, San Miguel, Maynila. Wenno iti [email protected] nga email address.

13. No adda pay kayatyo a malawlawagan, umawag iti tel. blng. (02) 736-3832.#

Comments are closed.