Footer

GMA Foundation, nagiwaras school bags, supplies

CERVANTES, Ilocos Sur – Walo nga ili iti probinsia ti benepisario ti GMA Foundation Unang Hakbang Para sa Kinabukasan program.

Kinuna ni vice gubernatorial-elect Jeremias “Jerry’ Singson a karaman dagiti nabenepisiaran iti daytoy a programa ti GMA Foundation ti innem nga  upland municipalities iti maikadua a distrito ken 2 nga ili iti umuna a distrito iti Ilocos Sur.

Nagiwaras ti nasao a pundasion kadagiti school bags ken school supplies para kadagiti agbasbasa iti pagadalan publiko, kasta met kadagiti delata ken dadduma pay a makmakan ken tsinelas para kadagiti nataengan nga agindeg kadagitoy nga ili.

Kinuna ni Singson a sakbayna, nagimtuod ti GMA Foundation iti Department of Education ditoy probinsia tapno itudona dagiti walo a 5th ken 4th class municipalities nga agbalin a benepisario iti proyekto ti nasao a pundasion.

Kinuna ni Singson nga idi Hunio 12, napanda nagiwaras kadagitoy a kasapulan dagiti agbasbasa nga ubbing iti Sugpon, Alilem, Galimuyod ken Salcedo ken idi Hunio 13 iti Sigay, Del Pilar, Caoayan, ken Sta. Catalina.

Tumultulong ti GMA Foundation nga agibunong kadagiti kasapulan dagiti agbasbasa nga ubbing nga agnaed kadagiti nakukurapay ken naseksek a lugar iti pagilian babaen ti pannakikammayyet dagiti dadakkel a pasdek-negosio ken sibiko.

“Makaanayen ti isem dagiti nabenepisiaran nga ubbing a mangpabang-ar iti barukong dagiti sumupsuporta iti daytoy a programa,” nakuna ni Mel Tiangco, nalatak a host ken maysa kadagiti kangrunaan a mangimatmaton iti nasao a pundasion.

Kabayatanna, nainaguraran ti maysa a water impounding project ditoy nga ili a makabael a mangpadanum iti 350 ektaria a taltalon.

Kinuna ni Singson a whole year round ti ubbog ditoy ket mapadanumanna ti taltalon ti Comillas Norte ken Comillas Sur.

“Adu ti danum ket kabaelanna nga irigasionan dagiti kataltalonan dagiti dadduma pay a barangay ngem agkurang laeng iti pundo,” nakuna ni Singson mainaig iti proyekto a nagbinnuligan nga impasdek ti Department of Agrarian Reform, ni Congressman Eric Singson ken dagiti municipal officials ditoy.#