Footer

P10-M nailatang para subsidy dagiti mannalon iti Candon City

CANDON CITY – Nangilatang ni Deputy Speaker for Luzon Eric Singson iti P10 milion kas tulong kadagiti mannalon iti daytoy a panagtatalon, segun iti city agriculturist ditoy.

Kinuna ni city agriculturist  Elmor Leaño a nailatang ti nasao a pundo para iti pannakagatang dagiti bin-i nga irik, mais ken niyog, kasta met kadagiti organic fertilizers a maited kadagiti mannalon ditoy babaen ti subsidy program.

“Maaramat ti pundo para iti daytoy a panagpapagay, kas koma iti seeds ken fertilizer subsidy partikular ti organic fertilizer, ken maited kadagiti coconut growers a subsidy para iti coconut seedlings program,”  panangilawlawag ni Leaño.
Kinuna ni Leaño a nupay nabingaybingay ti pundo, dakdakkel a gatad ti nailatang para iti irik ta adu kadagiti mannalon ti agor-order iti ibunubonda.
Segun ken ni Leaño, agpateg ti certified rice seeds iti P880 ngem P440 ti subsidy nga agtaud iti national government.  Kalpasan nga inikkatan ti city government iti P200, agbayad laengen ti mannalon iti P240 iti maysa a bag.
Babaen met iti subsidy program, kagudua laeng ti bayadan ti mannalon iti presio ti ganagan.
“Adda pay programa ti Department of Agriculture a no mangala ti mannalon iti hybrid seeds para iti maysa nga ektaria, adda libre a dua a bag nga organic fertilizer a maited kenkuana kas paset ti component program ti DA,”  kinuna ni Leaño.
Kabayatanna, lima ribu a sako ti ginatang ti city government nga organic fertilizers, ket insigida a maited kadagiti mannalon tapno dagus nga aramatenda.
Maysa ti panagaramat iti organic fertilizers kadagiti kangrunaan nga impaganetget ti City Agriculture Office kas maibasar iti direktiba manipud ken ni Presidente Gloria Macapagal Arroyo.
“Iti kallabes ngamin, sobra ti panagusar dagiti mannalon iti inorganic fertlilizers, ket nakitatayo a kasla nadadael ti klase ti daga… mapukpukawen ti micro elements ti daga,” kinuna ni Leaño.
Aganay a 200 nga ektaria ti mamulaan iti hybrid seeds ditoy Candon iti daytoy a tawen, ngem posible a nalawlawa pay, segun iti city agriculturist.

Comments are closed.