Footer

Pammadayaw ken ni Nelly Banaag

DIDA inawagan a bannuar. Ngamin awan ti ikutna a doliar. Awan ti maitedna a doliar a mainayon iti kaban ti ili. Dida man la dinayaw. Ti laeng adda kenkuana ket ti sipupuso a panagserbina. Ti sipapannakkel a panangakemna iti propesionna kas mannursuro. Ti panangakemna a kas maikadua nga ina dagiti ubbing nga isurona. Ti panangakemna iti pannakaimula dagiti nasayaat a sursuro ken tagipatgen (values) iti naganus a panunot dagiti adalanna. Ti panangmulina iti nasayaat a masakbayan dagiti adalanna iti eskuelaan.

Saan a bannuar. Ngem apay ngarud a pinatayda? Inakemna laeng ti responsibilidadna a kas pinusgan ti Commission on Elections  a mangipatungpal iti naurnos nga eleksion. Akem a dina met kiniddaw. Akem a dina koma kayat nga akmen gapu iti kinarugit ti politika iti pagilian. Akem a saan a rumbeng a maikumit iti kas kenkuana a napudno nga agserserbi iti ili.

Ngem nadangkok dagiti awanan puso. Pinuoranda ti presinto a yanda, ti Pinagbayanan Elementary School iti Taysan, Batangas. Agpadada iti poll watcher a ni Leticia Ramos a nakset ken natay, ken nakasugatan ti siam pay a kakaduada.

Dagiti mannursuro ti magungundawayan unay a propesional. Nagbaba la ngaruden ti sueldoda, isuda pay ti maipasungalngal tunggal eleksion.

Ti rigatna, ar-aramidenda la ngaruden ti umno a wagas ken naurnos a panangipatungpal iti akemda tunggal eleksion, isuda pay laeng ti maakusaran nga agar-aramid iti saan a nasayaat.

Maysa a nanumo a mannursuro ni Nelly Banaag. Biktima ti kinaranggas ti eleksion. Biktima dagiti agballa a politiko. Biktima dagiti saan a nalimpio ti panagpampanunotna nga agpampammarang nga agserbi iti ili. Kasano ngata ti panagserbi dagitoy a politiko iti ilida no isuda met ti mangidadanes kadagiti mannursuro?

Kadakami, sika, Nelly Banaag, ti bannuar iti amin a panawen. Sadi ngato a yanmo, tamdagam ti kinaranggas ti ilim. Tamdagam ti iniggesen a gimong a paggargarawan dagiti manglimlimo a karnero. Tamdagam ti panangpartida iti ina nga ili.

Ket kantaenmi met ti oda ken ti elihia iti piesta ti maskara.

Comments are closed.