Footer

Rob-hold-up gang member, naisangkot iti pammapatay

VIGAN CITY – Saan laengen a panaghold-ap no di payen pammapatay ti mapapati a nakaisangkotan ti maysa a kameng ti maysa a notorious robbery-hold-up gang nga agdakdakiwas iti Ilocos Sur ken Ilocos Norte.

Positibo nga intudo dagiti polis ti Batac, Ilocos Norte nga indauluan ni SPO1 Tomel Elmer Marcos ni Arturo Mapatac, 41, alias Suave, residente iti Zone 5, Bantay, Ilocos Sur a mapapati nga akinresponsable iti panakapapatay ni Ronald Rabanal iti Magnuang, Batac, Ilocos Norte.

 Positibo pay nga intudoda ti suspek nga adda pakaina-iganna iti  pannakatakaw ti Honda TMX a kukua ti maysa a Maddala.

Ti grupo ni Mapatac, 41,  a pakairamanan da Allan Navarro, alias Vhong,  taga-Luna, La Union ngem agnanaed iti Bayubay Norte, San Vicente, Ilocos Sur ken Edel Bauto, residente iti Jaen, Nueva Ecija ti mapapati a nagisayangkat kadagiti panag-hold-ap ken pannakaitaray dagiti motorsiklo dagiti biktimaenda iti Ilocos Sur ken iti Ilocos Norte.

Sakbayna, intudo dagiti biniktima ti grupo iti Magsingal ken Sto. Domingo, Ilocos Sur a da Mapatac ti nanghold-ap kadakuada ken nangkasakas ken nangitalaw iti motorsikloda nga XRM.

Maipalagip nga iti tengnga ti aldaw idi Abril 7, Sabado Gloria., nahold-ap da Felicidad Cabbab, 47, balikbayan, residente iti Villaviciosa, Abra ken ni Lorenzo Alcantara, 34, residente iti Naglaoaan, Sto. Domingo, Ilocos Sur bayat ti panangsarungkarda iti tanem ti kabagianda.

Nakasakas manipud kada Alcantara ken Cabbab ti dua a selpon, 2 a diaket, 1,800 Hongkong dollars, P41,000 cash ken intaray pay dagiti hold-aper ti kabarbaro nga XRM a motorsikloda.

Imbati dagiti hold-aper ti TMX a motorsiklo a mapapati a tinakawda met laeng.

Iti sabali a kaso, daldaliasaten da Edilberto Urmeneta, residente iti San Clemente, Magsingal, Ilocos Sur, a kaduana ni Mario Anagaran, 29, kalugaranna, ti Bossaoit Hills iti nasao met laeng nga ili a nakalugan iti XRM a motorsiklo idi abayen dagiti suspetsa a nakalugan iti XRM a motorsiklo nga awanan plaka sada pinaturongan dagiti biktima iti paltog ken inwaragawag ti hold-ap.

Kinasakas dagiti suspetsa ti selpon ken P5,000 a kuarta dagiti dua sada intaray ti lugan dagitoy.

Positibo met nga intudo ni Antonio Gambol, sabali pay a biktima ti panaghold-ap a taga-Candon City, dagiti suspek a nangsaneb kadakuada bayat ti panagdaliasatda iti Barangay Bagar, sada  intalaw ti XRM a luganda, agraman ti baketna.  Nakasubli ti babai ngem awanen ti luganda.

Kanaig daytoy, indagadag ti polis ti ipapan dagiti sabali pay a biktima iti panaghold-ap ken naitalaw ti luganda a mapanda bigbigen dagiti suspetsa iti provincial jail tapno mainayon a pakakasuanda. (Karaman ti report ni Danny Antalan)

Comments are closed.