Footer

Ti al-alia a pinarnuay ti Comelec

TI DI nakapappapati a resulta ti eleksion iti Maguindanao ti kapigsaan a pammaneknek nga adda naisayangkat a panagsiutik iti napalabas nga eleksion.

Umuna, 12-0 ti resulta ti eleksion ditoy a nagbanduriaan amin dagiti kandidato ti Team Unity ti administrasion. Awan uray maysa a kandidato ti oposision a limsot iti magic circle.

Maikadua, kas naipalaon iti certificate of canvass ti nasao a probinsia, 19 a kandidato a pakairamanan ti 7 a kandidato ti Genuine Opposition ti awan a pulos uray maysa a nabutosda.

Maikatlo, sobra unay ti kangato ti porsiento dagiti nagbutos iti daytoy a probinsia ta immabut iti 94% idinto a  60-70% laeng  ti average dagiti nagbutos iti intero a pagilian.

Ngem rason dagiti adda iti administrasion a saan a nakakaskasdaaw a kasta ti resulta ti eleksion iti Maguindanao agsipud ta malaksid (kano) a napigsa ti politikal a makinaria ti administrasion iti Mindanao, dandani awan ti impasango ti oposision a kandidatoda para iti lokal a posision.

No patien dagiti maraem nga agtuturay ti gobierno ken uray dagiti lokal a kandidato ken election officials iti daytoy a probinsia, nagun-od ti kasta a resulta agsipud iti makunkuna a command votes – kayatna a sawen, nagbutos dagiti agnaed kas iti kayat dagiti dadauloda wenno panglakayenda.

Rason a kas kaeppes iti apit iti natikagan a kataltalonan. Ta kayat a pagparangen dagitoy a tattao nga awan ti bukod a panunot, pangngeddeng ken pagtaktakderan iti politika dagiti agnaed iti Maguindanao. Kasla ketdin kayarigan dagiti agnaed iti nataldengan a kalding a no sadino ti pangakayan ida ti akintaraken, isu ti kapilitan a turongenda.

Ngem  uray munneng, saan la ketdi a mamati a maibbong ti maysa a kandidato, iti man lokal wenno nasional nga eleksion. Ta iti maysa a lugar, adda latta dagiti dida kayat ti padiktaran, ket kumontrada a mangibutos iti sabali a kandidato a saan a kandidato ti aniaman nga administrasion.

Talaga a saan a nakapappati ta mismo a kinuna pay ni Comelec chairman Benjamin Abalos nga “statistically improbable” ti resulta ti eleksion iti Maguindanao.

Ngem uray idi sakbay ti eleksion, maysan ti Maguindanao kadagiti masipsiputan a probinsia a posible a pakaisayangkatan ti panagsuitik nangruna ket saan a nakutkuti dagiti opisial ti Comelec a mapapati nga adda nakainaiganda iti panagsuitik iti eleksion idi 2004.

Mairaman ditoy ni Lintang Bedol, ti  provincial election officer ti Maguindanao a nadakamat ti naganna iti Hello Garci tapes a maysa kadagiti kinapatang ti timek a mapapati a ni dati a Comelec Commissioner Virgilio Garcillano tapno masaluadan dagiti butos ti kapatpatangna a babai a katimtimek ni Pres. Gloria Arroyo. Nagsori ni Pres. Arroyo ngem imbatadna a saan a nagsuitik iti eleksion.

Daytoy man met laengen nasao nga election officer ti kangrunaan a binilin da Abalos nga agpalawag no  kasano a nagun-od ti 12-0 a butos a pabor amin kadagiti kandidato ti administrasion iti Maguindanao ken mangikuyog kadagiti municipal certificate of canvass a pagbatayan ti national board of canvassers a mangbilang manen kadagiti butos iti dayta a probinsia.

Ngem kellaat a nagpukaw ni  Bedol a kas ken ni Garcillano ket sa la limtuad idi binallaagan ti Comelec En Banc a paarestona daytoy no saan pay nga agparang.

Ti problema, iti iluluttuad ni Bedol itay Hunio 11, ad-adda ketdi nga immuneg ti misterio ti eleksion iti Maguindanao agsipud ta impakaammona a natakaw dagiti COCs dagiti nadumaduma a munisipio ti probinsia. Saan a maipalawag ni Bedol no kasano a napukaw dagiti COCs iti opisinana iti provincial capitol.

Saan met a nagparang dagiti kameng ti municipal board of canvassers ken dagiti nangabak a kandidato iti panangayab kadakuada ti Comelec Manila.

Ita, kasano pay a maammuan no pudno met laeng a 12-0 ti resulta ti eleksion iti Maguindanao?

Iti daytoy a situasion, agkatangkatang pay laeng dagiti dua a kandidato a para senador nga adda iti maika-12 ken maika-13 a puesto.

Iti kaudian a resulta ti canvass ti Comelec, ni Pimentel ti maika-12 ken ni Zubiri ti maika-13.

Nasurok a 300,000 ti botante iti Maguindanao. Iti daytoy a bilang, mabalin a tippuogenna ni Pimentel ken lumsot ni Zubiri iti magic 12.

Malaksid iti tension, posible a saan pay ketdin nga agkirem nga agsipsiput dagiti dua a kandidato tapno masaluadan ti butosda.

Masipsiputan ngarud ti sumaruno nga addang ti Comelec – no ideklarana a failure of elections iti Maguindanao ken mangiwayat iti special election wenno dinan ibilang pay ti resulta ti eleksion agsipud ta awan ti pagibatayanda a municipal certificates of canvass.

Sumangsango ita ti Comelec iti narikut a situasion. Aniaman ti pangngeddengna, sigurado nga adda latta pakababalawanna.

Ngem no nagtignay laeng koma a dagus ti Comelec kalpasan ti eskandalo a pinarnuay ti Hello Garci tapes, ket inyalisna dagiti grupo a mapapati a naisawsaw iti mapapati a panagsuitik iti eleksion, saan koma a nagkaproblema iti kastoy a nasuroken a makabulan manipud idi naisayangkat ti eleksion nga agdama pay laeng nga agbilbilang ti poll body.

Nakapaltuad ti Comelec iti al-alia a nagbalin a mantsa iti imahena!

Comments are closed.