Footer

Dagiti Sangaili Iti Lubong (Maudi a Paset)

Iti pattapattana, adun ti nainumna ngem di pay naulaw. Saan a makaulaw ti arak dagitoy nga ansisit, kunkunana iti bagina…”

“Panawenen, kakabsatko ida!” kuna ti agtoktokar iti pluta. Nagtinnaliaw laeng dagiti aggayyem. Pinetpetan ni Ikko ti putan ti bunengna idinto ta nagpaliiw ni Angkuan iti sumaruno nga aramiden dagiti ansisit.

Inruar dagiti ansisit ti supotda. Nagwarasda  a nagpidut iti bato a babassit. Bassit ti lupot a supotda isu a babassit  a bato ti inkargada.

“Uray dakayo met, kakabsat. Agpidutkayo iti batbato ket ibulsayo. Partakanyo bassit ta  magmagna ti oras…”

Nagtinnalliaw dagiti aggayyem. Sintimek,  nagtungpalda a dua. Pinunnoda dagiti bulsada iti batbato.

Nagsubli dagiti ansisit iti atong ket linawlawda. Nagsubli met dagiti aggayyem. Manipud iti tugaw itay ti ansisit nga ubanan, napno manen ti gukayab iti nasam-it a sonata.

Di pay nalpas ti tokar idi marikna dagiti aggayyem ti saguyepyep. Nagsuyaabda. Naisurot dagiti padada nga ansisit.

“Panaginanan, kakabsat…maturogtayon a siuulimek…”

Ti ganukgok dagiti takong nga alingo ken uriis dagiti burias ti nangriing kadagiti aggayyem. Bimmalitok ti raya ti init a sumarut kadagiti nalalayog a sanga dagiti kaykayo. Adu ti alingo ken ugsa a maimatanganda nga umin-inum iti danum. Umariangga dagiti dua a salaksak a mangliklikos iti danum ti dissuor. Naingpis ti angep a kurtina ti aglawlaw.

Pinartakan ni Ikko ti bimmaba iti indayonna. Ginaw-atna ti gayangna. Ngem nabuaken dagiti ayup a nagtataray.

Adda nadlaw ni Ikko. Kinautna ti bulsana. Minirana. Nasileng!

“Umayka man ditoy, darsem!” arigna mandar nga insawang ni Ikko.

“Agurayka ta am-amirisek dagitoy adda iti bulsak!”

“Ania ngata dagitoy?” ni Ikko ti immasidegen ken ni Angkuan. Arig di makapagna ta napno dagiti dua a bulsana.

“Balitok….!”

“Wen nga agpayso!”

“Dagitoy dagitay piniduttayo idi rabii,” kinuna ni Angkuan.”

“No ammok la koma nga agbalin a balitok dagiti bato, inyad-aduk koma ti nagpidut!” kinuna ni Ikko.

“Adun daytoy a kinabaknang…” kinuna ni Angkuan, “…ilakok ket ibingayak met dagiti kakabsatko. Aggawidtan, pare….”

Ngem kasla awan ti nangngeg ni Ikko. Naglawa ti isemna.

“Addan sa pampanunotem?”

“Saanak pay nga agawid… Agsubliak no rabii iti gukayab dagiti ansisit. Sako ti pagkargaakon iti balitok!” kuna ni Ikko.

“Dika pay la kuntento kadayta?”

“Saan pay! Kaykayatko ti ad-adu! Nabakbaknangak no ad-adu ti balitokko…! No dimo kayat, agbatiak!”

“Kuntentoakon kadaytoy naited kaniak a kinabaknang. Umanay ngatan daytoy a pagbibingaynmi a tallo nga agkakabsat.”

Naggawid ni Angkuan. Agdagsen iti nasurok a tallo a kilo ti balitok nga inlakona.  Nagbibingayanda a tallo nga agkakabsat ti naglakuanna.

Maladingitan unay  ti sibubukel a purok ken ti pamilia ni Ikko ta simmangpet iti balayda a saanen a nalimbong ti panunotna. Saanen a matimtimek.

Ni Angkuan ti naggasto iti pannakaipan ni Ikko sadiay Mandaluyong, iti pagagasan dagiti saan a nalimbong ti panunotna.

KADAGITI dua a karakter, makitatayo ti aggidiat nga aramid. Ti maysa ket kuntento no ania daydiay naited kenkuana. Saanna pay a binukodan  ti gasatna no di imparanudna kadagiti kakabsatna.

 Pudno la unay a naimbag nga aramid ti panangiparanud kadagiti nasagrap nga imbag iti sirok ti init.

Ken ni Ikko a di nakuntento, nagballa. Nagmauyong. Saan a nalimbong ti panunotna a nagawid.

Kadagiti agay-ayat iti adu a kinabaknang iti lubong, agur-urnongda iti kinabaknang a dida maitugot iti tanemda.

Ngem ken ni Angkuan, impakitana ti  kuntentona iti kinabaknang a naited kenkuana. Saan a nagsapul iti ad-adu. Saan met a nagimut. Itoy a banag, saanna a tinagikua ti kinabaknang a dina maitugot iti tanem no di ti kinabaknang nga agnanayon.

Ti tao ket sangaili laeng itoy a lubong. Adu dagiti kinadatdatlag ditoy lubong. Naitalimeng iti pusona ti pudpudno a kinabaknang.  Sakbay a timmao ditoy rabaw ti daga, naimulan dayta a kinabaknang kenkuana.

Ngem iti kanito a di makuntento ken agsapul iti ad-adu a kinabaknang a di maitulad iti nakatalimeng a kinabaknang iti pusona, maisiasi iti pudpudno a dana ti biag. Matay a dina masagrap ti bunga dayta a kinabaknang iti pusona a naimula sakbay a naiyanak.

Ta ania ti serbi ti tao a tagikuenna amin a kinabaknang iti lubong no mapukawna met ti kararuana?

Kasta ti kayat a sawen ti sarsarita…#