Footer

Kontraktor, trike driver, nagudas iti pammaltog

STA. CRUZ, Ilocos Sur –  Napapatay ti maysa a kontraktor idinto a nasugatan ti maysa a kaduana kalpasan a natambangda itay lawasna iti barangay Calaoan iti daytoy nga ili.

Nagudas ni Johnny Padaloy y Bacani, 38, kontraktor, naasawaan ken residente iti barangay Bugbuga iti daytoy met laeng nga ili idinto a  nasugatan ni William Ulpindo, kaduana.  

Saan pay a nabigbig dagiti nangsaneb kadakuada ken no ania ti motibo ti pammaltog.

Iti inisial nga inbestigasion ti polis, naammuan a nakalugan dagiti biktima, pakairamanan da Paquito  Leal ken Elmer Contaoi iti maysa nga owner-type jeep nga agpadaya ket nagmenorda idi adda makitada a naipatengnga a traysikel a nakabalang iti dalanda.  

Kellaat a dimsaag iti traysikel ti dua a lalaki sada pinaltogan iti namin-adu a daras ti biktima.

Natay nga insigida ti biktima. Nairaman a napuntaan ni  Ulpindo ket naitaray iti ospital para iti panakaagas dagiti sugatna.  

Insigida a naglibas dagiti masuspetsa kalpasan ti panangisayangkat iti krimen.

Iti sabali a damag, awan pay ti maitudo a suspetsa mainaig iti pannakapaltog ti maysa a tricycle driver iti sitio Cangatuan, Barangay San Juan iti daytoy met laeng nga ili.

Kinuna dagiti polis ditoy nga awan pay ti pakaammuan no asino dagiti pimmatay ken ni Salvador Olaya y Quines, 25, naasawaan, ken residente iti barangay Poblacion Sur, Santa Cruz, Ilocos Sur.

Nasarakan ti biktima nga awanen ti biagna gapu iti sugat iti ulona.

Nakarekobre dagiti inbestigador iti kapsula iti abayna a nagtaud iti di pay ammo no ania ti kalibrena a paltog.

Iti inisial nga inbestigasion ti polis, naammuan nga adda inlugan ti biktima a pasaherona a nagpaitulod iti nasao a lugar. Masuspetsa a dagitoy a pasaherona  ti nangisayangkat iti nasao a pammapatay.