Footer

Maudi a session iti provincial board, 3 kameng nagpakada

VIGAN CITY – Naidumduma ti naangay a regular session itay Martes, Hunio 26, 2007 iti provincial capitol ta daytoy ti maudin a panagtitipon dagiti bokal kas kameng ti Sangguniang Panlalawigan ditoy.

Kalpasan a natratar dagiti nakalanad iti agenda a proposed resolutions ken ordinansa, naisaruno ti programa a panangipaay ti SP iti pammadayaw kadagiti agturpos iti terminoda ken saan a nailayon a kameng ti provincial board.

Nagturpos ti termino da Bokal Anna Liza Europa-Morales  ken Bokal Alexander Bistoyong idinto a naarus iti napalabas nga eleksion ni Bokal Chita Cordero.

Segun ken ni Cordero, inaramidna amin a kabaelanna a nagpaay a kas bokal ket dinanto pulos a malipatan ti panagserbina iti provincial board.

Impeksa met da SPM Ronnie Rapanut, Chuchi Purisima, Zuriel Zaragoza, Jose Bunoan, PCL President Robert Tudayan, ABC Federated President ken Ponciano Bagbagen ti panagyamanda iti panagtutunos ken panagtitimpuyogda a kameng ti provincial board iti pannakaipasa dagiti paglintegan para iti pagimbagan dagiti agnaed iti probinsia.

Saan a naituloy ni Bokal Mhel John Verzosa ti panagsaona gapu iti agdarison kenkuana a rikna iti panangpadasna a mangibisik iti pammakadana ken ni “auntie” ken “lola” Cordero.

Saan a nakadar-ay iti session da Congressman-elect Ronald Singson,  Bokal Morales ken ni Governor-elect Deogracias Victor “DV” Savellano a nakiatendar iti oathtakingda iti Malakaniang.

Naimbitaran dagiti nadumaduma a head offices tapno imatanganda ti maudi a session ti provincial board.

Comments are closed.