Footer

3 drug pusher, natiliw iti buy bust operation

NARVACAN, Ilocos Sur.  Tallo a mapapati a drug personalities ti kinemmeg dagiti pannakabagi ti linteg iti buy-bust operation nga insayangkatda iti Barangay Lungog ditoy.

Inaresto dagiti polis da Rodolfo Arconado, 30, baro, residente iti Bulanos ken ni Juriel Tobias, 27, baro, mannalon, ken residente iti Quinarayan, ditoy.

Tiniliw pay dagiti polis ni Walter Cantoria, 27, naasawaan, agnaed iti Santa Lucia, ditoy met laeng nga ili,  iti sabali pay a bust operation.

Iti immuna a buy bust operation a nagtipon nga insayangkat ti PDEA, Police Regional Office 1 ken dagiti polis ditoy babaen ti panangidaulo ni Major Marlo Castillo iti pagtaengan da Arconado ken Tobias iti Barangay Lungog, nakakumpiskada iti  2 a heat-sealed sachet a mapapati a naglaon iti shabu nga agdagsen iti 3.6 a gramo, 3 selpon ken marked money

Nangiwayat met dagiti police iti  follow-up operation ken ni Cantoria ket nakaalada iti  innem a small sachet a mapapati a naglaon iti shabu nga agdagsen tunggal maysa iti .5 gram, maysa a selpon ken marked money a mapapati a naaramat met laeng iti immuna nga operasion.

Naipatulod dagiti nakumpiska a mapapati a droga iti crime lab.

Mapapati a positibo iti droga  dagiti suspetsa iti drug testing a naisayangkat.