Footer

4 diksionario iti Ilokano, dadduma pagsasao

BATAC, Ilocos Norte – Uppat a diksionario iti Amianan ti nailungalong a maaramid tapno adda agpaay a pagibasaran ken pagbatayan iti Ilokano ken dagiti nadumaduma a pagsasao iti Amianan a Luzon.

Daytoy ti napagtitinongan dagiti partisipante a pakairamanan dagiti academicians, scholars, linguists, mamannurat, ken dadduma pay a cultural workers manipud iti Rehion 1, Rehion 2 ken Cordillera iti nasao a kom-perensia nga inangay ti Nakem Conferences, Philippines ken ti Mariano Marcos State University (MMSU) iti daytoy a siudad itay Hulio 26-27.

Nailungalong bayat ti komperensia  ti pannakaaramid ti uppat a diksionario iti Ilokano a pakairamanan dagiti nadumaduma a pagsasao iti Amianan a Luzon. Umuna ti Amianan English-Ilokano Dictionary, maikadua ti Amianan Ilokano-English Dictionary, maikatlo ti Amianan English-Filipino-Ilokano Dictionary, ken maikapat ti Amianan Dictionary of  Ilokano and Northern Philippine Languages.

Agpaay a project coordinator ti Diksionario Amianan ni Dr. Lilia Quindoza Santiago idinto a general editor ni Dr. Aurelio S. Agcaoili.

Naawis ni Editor ti Tawid News Magasin, Jaime M. Agpalo, Jr. a maysa kadagiti  tumugaw iti pannakaaramid dagiti diksionario.

Kaduana nga agpaay nga ethnolinguistic researchers ken editors dagiti sumaganad: Stanley Anongos, Benguet State University; Roy V. Aragon, Timpuyog dagiti Mannurat, Inc., Global; Ruperta Ramos Asuncion, University of the Philippines (UP), Los Baños; Zacarias Baluscang, Apayao State College; Leticia Benabese,  Abra State Institute of Science and Technology; Hermilinda Lingbaoan Bulong, UP Press; Elizabeth Calinawagan, UP Baguio; Prescilla Espiritu, University of Hawaii, Manoa; Annabelle Felipe, MMSU; Adelaida Lucero, UP Diliman; Philip Mandac, BSU; Joel B. Manuel, Department of Education, Ilocos Norte; Daniel L. Nesperos, GUMIL Filipinas; Bonifacio Ramos, Saint Mary’s University; Jaime Raras, University of Northern Philippines, Candon City; Noemi Rosal, UP Diliman; Antonio Tamayao, Cagayan State University; Elena Toquero, Isabela State University; Perla Ulit, MMSU; Carlo Vadil, Nueva Vizcaya State University; ken Alegria Tan Visaya, MMSU.

Aggapu ti pundo para iti nasao a proyekto manipud iti Komisyon ng Wikang Filipino ken ti National Commission for the Culture and the Arts.  Adda pay aggapu a pundo manipud iti University of Hawai’i in Manoa.  

Manamnama met a P5 milion ti ilatangda a pundo para kadagiti makipaset nga unibersidad nga agiwayat iti research.

Ti kinaawan dagiti diksio-nario iti Ilokano ken dadduma pay a pagsasao iti Amianan a pagibasaran kadagiti unibersidad ken kolehio ti kangrunaan a rason no apay a nailungalong ti proyekto.

Manamnama a mairuar dagitoy a diksionario iti 2008 agingga iti 2010. (Ma. Theresa B. Santos)

Comments are closed.