Footer

Agpispis-it iti sikog a baket, natiliw

BANTAY, Ilocos Sur – Saan nga agnanayon a mailemmeng ti maikurkurimed nga aramid, addanto panawen a maibuang ti palimed tapno sungbatan ti naglabsing ti dakes nga aramidna.

Inaresto dagiti polis ni Teresita Pido, 77, balo, residente iti Guimod ditoy kalpasan ti pannakaduktal iti pagtaenganna ti kaadda ti maysa a babai nga agkakapsut gapu iti panagpadarana.

Mapapati a napan nagparegreg ti nasao a biktima iti sikogna

Segun iti polis ditoy, nakaawat ti maysa nga empleado iti opisina ni Mayor Samuel Parilla iti text nga adda nangegna nga agpapaarayat a babai iti uneg ti pagtaengan ni Pido.

Mismo nga indauluan da Parilla ken ni Chief of Police Arsenio Ramos dagiti polis ken dagiti kameng ti rural health unit ditoy a nagturong iti barangay a yan ti pagtaengan ti baket.

Nadatnganda ni Sonia (parbo a nagan), 24, taga-Narvacan, Ilocos Sur, a nakapsuten ken  agpadpadara gapu iti mapapati a panangpis-it ti baket iti sikog ti babai.

Intarayda ti babai iti Gabriela Silang General Hospital para iti madagdagus a pannakatamingna.

Innala dagiti pannakabagi ti linteg ti baket iti police station tapno mapalutpot mainaig iti insidente.

Mapapati nga inannugot ti baket a duan a tawen nga agpispis-it iti sikog.

Ngem adda nagkuna a nabayagen nga abortionist ti baket.#