Footer

Bagyo Chedeng, Dodong, indatengda tudtudo, nangpalayas dagiti natikagan a kataltalonan

ILOCOS SUR- Nagkadua a banag ti insangbay ti nagsaruno a dua a bagyo ditoy probinsia: bang-ar kadagiti mannalon ken pukaw kadagiti sabali nga umili.

Iti ilalabas ni Bagyo Chedeng ken isasaruno ni Bagyo Dodong iti Batanes itay Agosto 7, indatengna ti tudtudo iti sumagmamano a probinsia iti Amianan a Luzon a pakairamanan ti Ilocos Sur a nabayagen a pinadpadaanan dagiti mannalon.

Iti nagsasaruno nga aldaw a panagtudona, inalistuan dagiti mannalon a rinaepan dagiti talonda nupay medio naladawen ti panagraepda.

Maysa a mannalon ti nagkuna a nalakayanen dagiti bunubonna ngem inraepna lattan napia la nga adda maapitna.

Segun iti maysa nga agrikulturista, basbassit ti maipi ti lakay a bunubon, saan a makadakkel unay ket basbassit ti maidawada.

Saan a nairaep dagiti bunubon agsipud iti kaawan ti tudo a mangpadanum kadagiti kataltalonan.

Adda met dagiti mannalon a saan a nakabunubon gapu iti napasaran a tikag ket iti nagsasaruno a panagtudona, nakarkarattotda a nagbunubon ken nagparaep.

Adu dagiti kataltalonan iti probinsia ti agpampannuray iti tudo tapno maraepan agsipud iti kaawan ti irigasion a pangawidan dagiti mannalon iti danum.

Iti sabali a bangir, indateng met da Bagyo Chedeng ken Dodong ti layus kadagiti sumagmamano a probinsia gapu iti nagtultuloy a panagtudona.

Saan a makadalan dagiti lugan ti Kennon Road gapu iti panagreggaay ti daga manipud iti bantay a nanggabor kadagiti kalsada.

Nupay kasta, nagtalinaed a silulukat iti trapiko ti Naguilian ken Marcos Highway.

Iti Metro Manila, nalayus dagiti nababa a lugar a nakakubongan dagiti residente.

Rinibu a residente iti Bulacan ken Pampanga ti naibakuit gapu iti idadakkel ti karayan a nanglayus iti lugarda.

Gapu iti nagtultuloy a bayakabak, indeklara ti Malakaniang ti pannakasuspenso ti klase iti amin a level iti Metro Manila, Cavite, Pampanga, Rizal, Tarlac, Bulacan, La Union, Pangasinan, Zambales, Bataan, Benguet, Mountain Province, Ilocos Norte ken daytoy a probinsia.

Ditoy probinsia, naammuan ken ni Vice Gov. Jerry Singson a nagreggaay ti bantay iti Cervantes ket saan a makalasat dagiti lugan.

Kinuna ti bise gobernador a posible a sumagmamano nga aldaw santo mawaknitan dagiti gabor.

Iti met sitio Pideg, nagdissuor ti danum iti kalsada gapu iti pannakasullat ti cross drainage a nakaigapuan ti pannakataktak dagiti agbiahe iti aganay dua oras.

Maymaysa pay laeng ti lane a maar-aramat iti daytoy a paset ti nagbeddengan ti Santa ken Narvacan.

Iti Baguio, nagaburan ti balay ni Gina Rennon iti Slaughterhouse compound iti panagrissuod ti daga a nakatayan ni Raniel, ti walo ti tawenna nga anakna.

Ketdi, ngimmato ti level ti danum dagiti dam ken dadduma pay a pagurnongan ti danum a pakairamanan ti Angat Dam, San Roque Dam iti Pangasinan, Magat Dam iti Isabela, Binga ken Ambuklao Dam iti Benguet, ken Ipo Dam iti Bulacan.

Nupay kasta, kinuna ti maysa nga opisial ti PAGASA a saan pay a napugsat ti tikag ket kasapulan ti ad-adu pay a tudo tapno agsubli iti normal a level dagitoy a pagurnongan iti danum.#