Footer

Baro, biniktima ti Budol-Budol Gang, intarayda selpon, kuartana

VIGAN CITY – Nangbiktima manen ti Budol-Budol gang ditoy siudad.

Nagpulong iti polis ni Jeward de Peralta, 17, baro, residente iti Mabilbila Sur, Santa, Ilocos Sur a linoko ti dua a lalaki ket intarayda ti selponna ken P400 a kuartana.

Naammuan iti panagimbestiga dagiti polis nga inasitgan dagiti dua a lalaki ni de Peralta bayat iti kaaddana iti maysa a computer shop ditoy ket nagpatulong dagitoy nga adda birbirokenda a mechanical shop iti siudad ngem saanda a masapulan.

Adda bitbit ti maysa a bungon a mapapati a naglaon iti kuarta.

Sinublat ti maysa ti selpon ni de Peralta tapno tawaganna ti maysa a kaduada ket nagpabus-oy met ti biktima.

Kalpasan ti panangkontak dagiti dua iti kaduada,  imbagada a mapanda kitaen  ket simmublatda iti P400 ken ni de Peralta sada imbati ti bungon nga imbagada a subliendanto met laeng.

Saanen a nagsubli dagiti dua.

Kinuna ni de Peralta nga idi dina mauray dagiti suspetsa, linuktanna ti bungon ket dita a naduktalanna a pasig a nagetgetteng a papel ti naggianna.

Addan sumagmamano a nabiktima ti Budol-Budol Gang ditoy a siudad nga inted dagiti nagtalek a biktima ti kuarta ken gamengda gapu iti makaguyugoy a pannakipatpatang dagiti suspetsa.#

 

Comments are closed.